Qırımnıñ beş sakini Rusiyeniñ ekstremistler cedveline kirsetldi - uquqimayeci

Rusiyeniñ maddiy monitoring hızmeti daa beş Qırım sakinini ekstremistler ve terroristler cedveline kirsetti dep haber ete Qırım uquqimaye gruppası.

Uquqimayecilerniñ malümatına istinaden, cedvelge yaltalı ukrain faali Larisa Kitayskaya, aqyarlı solcu faal Valeriy Bolşakov, kezlevli sol faal Yevgeniy Karakaşev, ekstremizmde qabaatlanğan Aqmescit rayonınıñ sakini İsmail Ramazanov ve yaltalı Elina Mamedova kirsetildi.

Qırımda olar ictimaiy ağlardaki paylaşuv ve derc etken malümatları, kütleviy surette ekstremizm faaliyetine çağırıv, nefret ve duşmanlıq doğuruv içün qabaatlana ya da artıq mahküm etilgendir.

Uquqimayeciler fikrine köre, rusiyeli memuriyet Qırım sakinlerini siyasiy sebeplerden dolayı taqip ete.

“Qabaatsızlıq prizumtsiyası bozula, çünkü de-facto üküm sürgen Rusiye qanun sistemasına çerçivesindfe bile, bu insanlarnıñ qabaatı isbatlanmadı, faqat olar Rosfinmonitoring saytında kütleviy surette ekstremist ve terrorist dep kösterile ve aq-uquqları sıñırlanğan sayıla. Qırım vaziyetine kelgende ise, Ukraina vatandaşlarınıñ ekseriyeti Rusiye CK-daki ekstremistik ve terroristik maddelerge istinaden qanunsız taqip etile, albuki, olar iç bir cinayet işlemegeni belli”, – dep saya Qırım uquqimaye gruppasınıñ yolbaşçısı Olga Skripnik.

“Ekstremistler cedveline” kirsetilgen Qırım sakinleri bank kartları ve notarius hızmetinen faydalanıp olamağanları aqqında haber ete.

Uquqimayeciler aytqanına köre, maddiy, bank ve kredit teşkilâtları Rosfinmonitoring cedveline kirsetilgen şahıslarnıñ esaplarını blok etebile, uquqiy ve muasebe hızmetleri bergen adliyeci, notarius ve işadamaları hızmet bermekni red etebile.

Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan “Hizb ut-Tahrir” ile alâqası olğanında şeklengen musulmanlarnıñ evlerinde sıq-sıq tintüvler keçirip başladı.