Çehiya AQŞ-nıñ “Qırım beyannamesi”ne qoltuttı
Çehiyanıñ Tışqı işler nazirligi, AQŞ-nıñ halqara uquqqa uymağan Qırım işğalini qabul etmegenleri aqqında, “Qırım beyannanesi”ni alğışladı.
“Biz Pompeonıñ “Qırım beyannamesi”ni alğışlaymız. Qırımnıñ qanunsız işğali halqara uquqnı bozmaqta. Transatlantik birliginiñ al etici emiyet bar”, - iyülniñ 26-sına Twitterde derc etilgen beyanatta bildirile.
İyülniñ 25-nde AQŞ devlet kâtibi Mayk Pompeo, Qoşma Ştatlar Rusiye ilhaq etken Qırımnı iç bir vaqıt tanımaycağı aqqında yazılğan «Qırım beyannamesi» çıqardı. Pompeo ileride de Ukrainanıñ topraq bütünligi tiklenmesinde israr etecek dep ayttı.
Rusiye TİN Pompeonıñ beyannamesini izaatlar eken, AQŞnıñ tış siyaseti istiqrarsız olğanı aqqında ayttı.
Ukrainanıñ prezidenti Petro Poroşenko Qırım işğalini qabul etmegen beyannameni alğışladı.
2014 senesi mart ayında Rusiye Ukrainağa bağlı olğan Qırım yarımadasını ilhaq etti. Halqara cemaatçılıq Qırımnıñ ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.