Surbistan prezidenti, onıñ devleti Qırımnı «Rusiyege bağlı» olğanını ne içün tanımağanını añlattı
«Biz Qırımnı Rusiyege bağlanğanını tanımadıq. Biz bunı yapqan olsa edik, Kosovanıñ mustaqilligine qol tuttıq degen manağa kelecek edi», – dedi Sırbistan lideri.
Aynı zamanda o Belgrad ne içün Rusiyege qarşı sanktsiyalar kirsetmegenini de añlattı.
«Sırbistan Rusiyege qarşı sanktsiyalar kirseterek,öz ayağına qurşun atamaz. Öziñizni menim yerime qoyıp baqıñız. BMT Telükesizlik Şurasınıñ daa angi bir daimiy azası bizim topraq bütünligimizge qol tuta. Er kes bizim pozitsiyamıznı añlay», – dedi Vuçiç.
Onıñ sözlerine köre, Sırbistan ABne aza olacağınen bağlı körüşüver keçirgen maalde Rusiyege qarşı kirsetilgen sanktsiyalarğa qoşulmaycaq, kelecekte ise, Rusiye ile Avropa Birligi arasında munasebetler eyileşecegine inana.
1998-1999 yıllarda Kosovalı arnavutlarnıñ silâlı qarşılığı Sırbistanğa qarşı 78 kün devam etken NATOnıñ ava ücümlarından soñ yekünlendi, bu ise etnik arnavutlarğa nisbeten yapılğan qanlı repressiyalarnıñ toqtatılmasına sebep oldı.
O zamanki Sırbistan lideri Slobodan Miloşeviç Kosovanıñ etnik arnavutlarına qarşı yapqan repressiyalarında 10 biñ insan qurban ketti.
2008 senesi Kosova bir taraflama olaraq Sırbistandan mustaqil olğanını ilân etti. Yañı devletni 113 devlet şu cumleden ABD de tanıdı. Sırbistan ve Rusiye ale daa Kosovanıñ mustaqilligini tanımay. Ukraina da Sırbistan terkibindeki muhtar bölgenen iç bir diplomatik munasebeti qurmağandır.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.