Suriye: Şarqiy Gutada himiyeviy ucüm neticesinde onlarca elâk olğanlar aqqında bildireler
Azatlıq Radiosınıñ bildirgenine köre, bu raqamlarnı «Beyaz miğferler» adınen belli olğan Suriye vatandaşlar mudafaası teşkilâtı bildire. Elâk olğanlarda himiyeviy silânıñ qullanılğanınıñ alâmetleri bar – kenişlegen köz bebekleri ve ağızdan çıqqan köpük.
Duma şeerindeki himiyeviy ucümniñ neticesinde zarar körgenlerniñ sayısı – yüzlernen kişi.
Suriye-Amerika tıbbiy cemiyeti ve Dumadaki vatandaşlar mudafaası teşkilâtınıñ ortaq bildirüvinde aytılğanına köre, olarda 49 elâk olğan kişi aqqında malümat bar.
Bu bildirüvge köre, tıbbiy merkezlerge nefes zorluğı çekken 500-den ziyade kişi tüşti, zarar körgenlerden hlor qoqusı kele.
Tıbbiyet hadimleri ve faaliyetçilerniñ malümatına köre, zeerli gazlar şeerge helikopterden atılğan «çapçaq bombaları» içinde buluna ediler. Bu adnen, Suriyeniñ ukümet orduları tarafından qullanılğan, öz qolnen yasalğan quvetli bir patlayıcı tertibatlar belli. İnsanlarnıñ çoqusı evlerniñ yertölelerinde boğuldı. Sakinler anda avadan yapılğan ucümlerden saqlana edi, ve anda gaz qolaylıqnen barıp tüşti.
İçtimaiy ağlarda, elâk olğanlar ve şu cümleden balalarnıñ, ağızlarında köpük ile fotosuretlerrini derc eteler. Olarnıñ doğrulığı şimdilik tasdiqlanmadı. Suriye ukümeti ve onıñ ittifaqdaşı Rusiye bu bildirüvni sahte deyler.
Bunıñ kibi de elâk olğan ve zararlanğanlarnıñ sayısı aqqında malümat da mustaqil menbalardan tasdiqlanmadı.
Suriye ukümeti ve onıñ ittifaqdaşı Rusiye bu bildirüvge sahte deyler.