Бозгашти кайҳонавардони "Артемис -2" ба Замин

Киштии кайҳонии амрикои "Орион", ки бо чаҳор фазонавард ба Моҳ парвоз карда буд, бо муваффақият баргашт. НАСА ё Оҷонси кайҳоншиносии Амрико аз фуруд омадани кайҳонавардон дар соҳили уқёнуси Ором, дар Иёлоти Муттаҳида хабар додааст.

Ин парвози таърихӣ дар доираи маъмурияти дувуми Артемис ва баъди 53 сол сурат гирифт ва онро як озмоиши муҳиме барои бозгашти инсоният ё фатҳи дубораи Моҳ меноманд.

Се фазонаварди амрикоӣ ва як фазонавард аз Канада рӯзи якуми апрел бо капсулаи “Орион” ё киштии кайҳонии НАСА барои аввалин бор дар таърихи инсоният дар умқи кайҳон ё масофаи рекордии дур аз Замин чарх заданд. Ин сафари озмоишӣ 10 рӯзро дар бар гирифта, ҳадаф санҷиши вазъу тобоварии кайҳоннавардон дар масофаи дур буд.

Раиси ҷумҳури ИМА, Доналд Трамп дар шарҳи бозгашти фазонавардон ба замин гуфт: "Ҳайати олиҷаноб ва боистеъдоди "Артемис-2" -ро табрик мекунам. Тамоми парвоз ҷаззоб ва фурудоӣ ҳам олӣ буд. Чун президенти Иёлоти Муттаҳида ман бениҳоят ифтихор дорам! Бесаброна интизори дидор бо шумо дар Қасри Сафед ҳастам. Мо ин корро такрор мекунем ва қадами баъдӣ, Марс хоҳад буд”- навиштааст, Трамп дар шабакаи иҷтимоии Truth Social

"Артемис -2” як бахши калидии барномаи кайҳонии ИМА мебошад. Идомаи тарҳҳои Оҷонси кайҳоншиносии Амрико ё НАСА аз муваффақияти ҳамин гурӯҳи кайҳонавардон вобаста буд. Интизор меравад, ки аллакай соли оянда парвози навбатии кайҳоннавардон бо фуруд омадан ба сатҳи Моҳ сурат гирад. Иёлоти Муттаҳида силсилаи парвозҳои дигарро ҳам ба фазо дар нақша дорад, ки бояд дар даҳсоли оянда иҷро шаванд.