Сафорат гуфт, ҷасади модару духтарро аз Русия ба ватан мефиристанд
Сафорати Тоҷикистон дар Русия хабар дод, ки ҷасади Шоира Раҳимқулова, муҳоҷири 23-солаи тоҷик ва духтари чорсолаи ӯро ба ватан интиқол медиҳанд.
Шоира ҳамроҳ бо Умигулсун Пирхонова, духтари чорсолааш шаби 13-уми декабр дар вилояти Маскав аз бӯи газ заҳролуд шуда, фавтидаанд. Наздиконаш гуфтанд, ки имкон надоранд, ҷасадҳоро ба Тоҷикистон интиқол диҳанд.
Рӯзи 19-уми декабр сафорати Тоҷикистон дар Маскав хабар дод, ки барои интиқоли ҷасадҳо бо мақомоти Русия ҳамкорӣ доранд. "Мо ин қазияро аз аввал пайгирӣ доштем. Мушкилот танҳо дар он буд, ки хешовандони наздики фавтидагон дар Федератсияи Россия қарор надоштанд. Тавре маълум аст, ҷасадҳо танҳо ба хешовандони наздик супорида мешаванд. Ҳамчунин бояд қайд кунем, ки аз ҷониби Сафорат ҳамаи кӯмакҳои зарурӣ барои интиқол додани ҷасадҳо ба Ватан сурат гирифта истодаанд.",-- гуфта шудааст, дар хабарномаи сафорат.
Пештар Додситонии вилояти Маскав хабар дода буд, ки муҳоҷирони тоҷик дар хонаи як сарватманди чинӣ кор мекарданд. Он шаб, лулаи газ дар яке утоқҳои хона шикоф шуда, бӯй тамоми атрофро пахш кардааст. Аз бӯйи газ, муҳоҷирон бедор нашуда, фавтидаанд, вале ба гуфтаи додситонӣ Лю Чен, шаҳрванди Чин, ки ҳамроҳи муҳоҷирон дар он ҳавлӣ будааст, зинда мемонад ва ба Ёрии таъҷилӣ занг мезанад. Соҳиби хона дар Русия набудааст ва ин марди чинӣ кори муҳоҷиронро назорат мекардааст.
Ҳамроҳ бо Шоира ва духтараш ҷавони дигари муҳоҷир бо номи далер низ будааст, ки ҷасади ӯро ба ватан равон карданд.
Парвина Абдуллоева, духтари холаи Шоира рӯзи 18-уми декабр дар суҳбат бо Радиои Озодӣ гуфта буд, ки дар Русия касе надоранд ва намедонанд, ки чӣ тавр ҷасадҳоро аз сардхона (МОРГ) гирифта ба ватан фиристанд.
Русия макони кори ҳудуди як миллион муҳоҷири тоҷик аст. Солҳои ахир ба муҳоҷират рӯ овардани занон низ афзоиш ёфтааст. Бар асоси оморҳои расмӣ ҳудуди 80 ҳазор зани тоҷик барои кор ба Русия рафтаанд.
Фавти муҳоҷирон дар сӯхтор, садамаҳои нақлиётӣ ва дигар ҳодисаҳои тасодуфӣ зиёд сабт мешавад. Соле беш аз ҳазор тобути муҳоҷиронро ба ватан меоранд.