Гурӯҳи вижа худсӯзии як занро дар Узбекистон таҳқиқ мекунад

Додситонии вилояти Қашқадарёи Узбекистон барои омӯзиши қазияи сокини ноҳияи Косон Муқаддас Мустафоева, ки 19 феврал дар эътироз ба тахриби манзили зисташ дар назди бинои додситонӣ худро оташ зад, гуруҳи махсуси корӣ ташкил кард.

Ба иттилои хадамоти матбуотии ноҳияи Косони Қашқадарё, гуруҳи кориро додситони калони вилоят Шохрух Ҳақбердиев раҳбарӣ мекунад. "Парвандаи ин ҳодисаро мутахассисони ҳукумати ноҳия, додситонӣ ва шахсони бетарафи мустақил ҳамаҷониба меомӯзанд",-омадааст дар иттилоияи ҳукумати Косон.

Ҳафта гузашта расонаҳо хабар доданд, субҳи 19-уми феврал Мустафоев ҳамроҳ бо падараш барои супурдани ариза ба додситонии вилоятии Қашқадарё рафтанд, вале посбонон нагузоштанд, ки падару духтар вориди бино шаванд. Дар натиҷа Мустафоева ба сару рӯяш бензин пошида, назди бинои додситонӣ худсӯзӣ кард. Олим Мустафоев, падари 66-солаи вай ҳангоми талоши наҷот додани духтараш ҷароҳат бардошт.

"Манзили духтари ман тибқи нақша бояд тахриб шавад. Мо як сол аст, ки зидди тахриб мубориза дорем. Касе намехоҳад моро гӯш кунад. Акнун мақомот мехоҳанд, тавассути додгоҳ хонаро тахриб кунанд. Аз ҳамин хотир духтарам худро назди додситонӣ оташ зад. Ман талош кардам, ки оташи ӯро хомӯш кунам, вале дастонам сӯхтанд. Бензин дар сару тани ман рехт ва дигар узвҳоям ҳам сӯхтанд", -гуфта буд Олим Мустафоев.