Беш аз 200 мошини борбар дар марзи Қирғизистону Қазоқистон дармондаанд
Бархе аз мошинҳо аз тафтиш нагузашта, аз марз баргардонида шудаанд. Абдикариева хабари комилан қатъ шудани убури мошинҳои борбарро рад кард.
"Санаи 30 март дар як рӯз 150 мошин марзи Қазоқистонро убур кард. Ин теъдод мошинҳо аз марз гузашта, ҳамин адад мошини дигар дар назди марз ҷамъ шудааст. Яъне, дар ҳар сурат мошинҳо аз марз мегузаранд, онҳое, ки ҳуҷҷатҳояшон ба талаботи ҷониби Қазоқистон ҷавобгӯ аст, мушкиле надоранд", - гуфт Абдикариева.
Ҷамъшавии мошинҳо дар марз ба тӯлонӣ шудани замони тафтиш рабт дорад. Дар гузаргоҳҳои дигари марзии байни ду давлат чунин ҳолат дида намешавад.
Ҷониби Қазоқистон то кунун расман сабаби тӯлонӣ ва сахттар шудани тафтиш дар марзро шарҳ надодааст.