سوري چارواکو له مسکوه غوښتي چې تیروتنې اصلاح کړي
د فرانس پرېس خبري آژانس د راپور له مخې، دا څرګندونې د سوریې د نوي مشرتابه له خوا د روسي پلاوي سره د خبرو پر مهال شوې دي، چې دا مهال سوریې ته په سفر تللی دی.
دا له هغه وروسته سوریې ته د یوه روسي پلاوي لومړی سفر دی، چې د بشار اسد رژیم نسکور شو.
روسیه د اسد نژدې ملاتړې بلل کېده.
د سوریې د مشرتابه په اعلامیه کې راغلي، دوی له روسي چارواکو سره په خبرو کې ټینګار کړی، چې مسکو باید د اړیکو د بیا رغولو لپاره خپلې تېروتنې اصلاح کړي، د سوریې د خلکو غوښتنو ته درناوی وکړي او د هغوی د ګټو لپاره کار وکړي.
له دې وړاندې د کریملین ویاند دیمیتري پسکوف په مسکو کې له خبریالانو سره په خبرو کې د روسي پلاوي سفر سوریې ته مهم بللی و.
پسکوف ویلي، اړینه ده چې له نوي مشرتابه سره دایمي خبرې اترې وساتل شي، او مسکو به په دې لاره کې خپلې هڅې دوامدارې وساتي.