د پاکستان او افغانستان کرکټ لوبډلې ۳ شل اوریزې سیالۍ کوي
سيټي د یوه رسنیز کنفرانس پر مهال وویل چې د دواړو هېوادونو د کرکټ ادارې هوکړې ته رسېدلي او دی د پاکستان حکومت اجازې ته منتظر دی.
نوموړي ویلي: "د افغانستان کرکټ له چیرمین او اجرایوي رییس سره زما ملاقات وشو په دوبۍ کې، د هغوی غوښتنه دا وه چې مونږ ته درې مېچونه راکړه، زما موقف دا و چې که د کرکټ نړیوال جام سوپر لیګ سیالۍ ترسره کړو دواړو هېوادونو ته یې ګټه نه شته ځکه نړیوال جام ته مو لار موندلې ده، خو دا چې اسټرالیا له تاسې سره لوبې ونه کړې او ستاسې ډېر تاوان وشو، نو پاکستان او افغانستان به درې شل اوریزې سیالۍ په شارجه کې ترسره کړي."
د پاکستان کرکټ مشر زیاتوي چې دا سيالۍ به د «پاکستان سوپر لیګ» تر سیالیو وروسته ترسره کېږي او له لوبو څخه لاسته راغلې ګټه به دواړه بورډونه په شریکه تقسیموي.
نجم سيټي همدارنګه ویلي چې تر دې دمه د پاکستان حکومت له لوري اجازه نه ده ورکړل شوې، خو په وینا یې، ډاډه دی چې حکومت به د سیاليو لپاره ډېر ژر اجازه ورکړي.
وروسته له هغې چې اسټرالیا له افغانستان سره په مارچ میاشت کې له لوبو کولو انکار وکړ، د افغانستان کرکټ بورډ ادارې وویل ډېر ژر به له پاکستان سره یوه لوبلړۍ اعلان کړي.