په بدخشان کې د موټر اوښتو پېښه کې لږترلږه ۶ کسان مړه شوي
د دې ولایت لپاره د طالبانو د اطلاعاتو او فرهنګ رییس معزالدین احمدي د شنبې په ورځ ازادي راډیو ته وویل، چې دغه لنډکروزر موټر د مایمی ولسوالۍ په شاجه ګون سیمه کې نسکور شوی چې ۶ کسان یې مړه کړي او ۳ نور ټپیان کړي دي.
هغه ونه ویل چې دغه پېښه کله شوې ده.
خو ځینو سرچینو ویلي دغه پېښه د جمعې په ورځ شوې او دغه موټر د بدخشان له مرکز د مایمی ولسوالۍ پر لوري روان و.
د واورې زیات اورښت، د ټرافیکي اصولو نه رعایتول او د موټرچلوونکو بې احتیاطي د ډېرو ټرافیکي پېښو اصلي علت بلل شوی دی.