نوین الحق: بیګ باش سیالیو کې ګډون نه کووم
هغه په خپل ټوېټر لیکلي دا پرېکړه یې د اسټرالیا د کرېکټ بورډ د وروستي اعلان په غبرګون کړې چې له افغانستان سره یې درې یو ورځنۍ لوبې لغوه کړي.
نوین الحق د اسټرالیا د کرېکټ بورډ پرېکړه «ماشومانه» بللې او ویلي یې دي چې د کرېکټ د ملاتړ پر ځای د افغانانو یواځینۍ خوښي هم ترې اخلي.
نوین الحق د بېګ باش لیګ په سیډني سکسرز لوبډله کې شامل شوی و.
د اسټرالیا کرېکټ بورډ نن وختي اعلان وکړ چې په مارچ میاشت کې له افغانستان سره پلان شوې دری یو ورځنۍ لوبې يې په افغانستان کې د نجونو او ښځو وضعیت ته په کتو لغوه کړې دي.
دغه بورډ ویلي د افغان ښځو او نجونو لپاره د ښو شرایطو په تمه به د د دې هېواد له کرېکټ بورډ سره همکارۍ ته دوام ورکړي.
د طالبانو سرپرست حکومت د ښځو او نجونو پر لوړو زده کړه د بندیز ترڅنګ په دې ورستیو کې ښځې په کورنیو او بهرنیو نادولتي موسسو کې له کار کولو هم راګرځولي دي.