د سویلي افریقا د کرکټ سوداګریزې سیالۍ پیلېږي
دغه لوبه به د کابل پر وخت د شپې اته بجې وي.
په دې سیالیو کې ټولټال ۶ لوبډلې یو د بل پر وړاندې سیالۍ کوي او یوازینی بهرنی لوبډلمشر یې د افغانستان د شل اوریزه لوبډلې لوبډلمشر راشدخان دی.
د دې لیګ لوبډلې د ډربن سوپر جاینټز، جوبرګ سوپر کینګز، ممبي کپيټاون، پارل راویلز، پرېټوریا کپيټل او سن رایزرز ایسټرن کيپ په نومونو نومول شوي دي.
راشدخان چې د ممبي کپيټاون لوبډلمشر دی د یاد لیګ د پرانستې په مراسمو کې یې ویلي وو: " زه ډېر خوښ یم چې د سویلي افریقا په لیګ کې لوبېږم. دا زما لپاره یو ښه فرصت دی. زه په لومړي ځل په سوداګریزو سیالیو کې د یوې لوبډلې مشري کوم، که څه هم ما د افغانستان ملي لوبډلې لوبډلمشري کړې ده او د هند په غوره لیګ سیالیو کې هم د مرستیال لوبډلمشر په توګه وم، هڅه به وکړم چې له لومړۍ لوبې خپله لوبډله ښه رهبري کړم."
یاد لیګ په لومړي ځل په ۲۰۱۷ کال د سویلي افریقا د کرکټ بورډ ادارې له لوري د ګلوبل شل اوریزو سیالیو په نوم اعلان شو، وروسته یې د منزي شل اوریزو سیالیو نوم ورکړ، خو تر ډېره د مالي ستونزو له امله پرمخ نه تلې.
د یاد هېواد کرکټ ادارې مشر ګریم سمیت تر پرلپسې هڅو وروسته د هندوستان غوره لیګ پانګه وال راضي کړل او اوس د ټولو لوبډلو امتیازات له دوی سره دي.
د یادونې ده چې دغه سیالۍ به د فبرورۍ میاشتې تر ۱۱ نیټې پورې دوام وکړي.