کونړ کې د پخواني نظام دوه پوځيان وژل شوي
یوه امنیتي چارواکي د نوم نهښودلو په شرط ازادي راډیو ته وویل، دوه کسان چې د ننګرهار د مرکز جلال اباد اوسېدونکي وو او د کونړ ولایت نرنګ ولسوالۍ ته مېلمه تللي وو، د کور له مالک سره یو ځای وژل شوي دي.
د کونړ د مرکزي روغتون سرپرست ډاکټر مطیع الله ازادي راډیو ته وویل، له نرنګ ولسوالۍ څخه دوه جسدونه ور وړل شوي دي.
نوموړي وويل: "د یوه هویت معلوم دی چې د شلتن د درې اوسېدونکی دی، د هغه ځای خلک هم راغلي وو، خو دا بل یو معلوم نهدی چې د کوم ځای دی. دوه جسدونه دي، اوس کفنونه ورکول کېږي او تیاروي یې."
بلخوا د لغمان ولایت امنیه قوماندانۍ خبر ورکړی چې دوه تنه طالبان د یوه رېنجر موټر د ټکر په پېښه کې وژل شوي او څلور نور ټپیان دي.
دې قوماندانۍ په یوه بیان کې ویلي، پېښه هغه مهال وشوه چې د طالبانو رېنجر د الینګار ولسوالۍ په نورلام سیمه کې د سړک د غاړې پر ماین برابر شو.
بیان زیاتوي چې د دې برید د عاملانو د نیولو لپاره هڅې روانې دي.