د ترکيې سرې مياشتې ټولنه د پکتيکا زلزلهځپلو ته کورونه جوړوي
د سږ کال په دوبي (جون) کې شدیدو زلزلو په پکتیکا اوخوست ولایتونو کې تر زرو ډېر کسان مړه او زرګونه نور ژوبل کړل.
د دغو زلزلو له کبله لسګونه زره خلک بې کوره شول.
د ځايي چارواکو په وینا لا هم د پکتیکا په ګیانې کې ۴۵۰۰، په برمل کې ۱۵۰۰ او په سپېره ولسوالۍ کې له ۵۰۰ تر ۶۰۰ کورونو ته اړتیا ده.
د دوی په وینا ټولو بې کوره شویو ته خېمې نهدي رسېدلي او ژمی را روان دی.
د ګیان ولسوالۍ يوه اوسېدونکي کوثر ازادي راډیوته وویل: 'زموږ خاندین کلي شاوخوا ۲۴ شهیدان ورکړي دي، زما خپل پلار هم شهید شوی، دغسي ۱۹ یا ۲۰ کورونه ویجاړ شوي دي."
دغه راز د سيمې بل اوسېدونکی رحمت الله وايي: "ژمی را روان دی، زموږ کورونه ویجاړ دي، موږ ته دې خپل کورونه جوړ شي او سړک دې راته جوړ شي."
د ملګروملتو اړوندو موسسو د پکتیکا په برمل ولسوالۍ کې بې سرپناه خلکو ته د کورونو په جوړولو پیل کړی دی.
دوی همدا راز غواړي چې په ګیانې ولسوالۍ کې هم کورونه جوړ کړي.
په همدې منځ کې د ترکیې سره میاشت ټولنه غواړي په دوو کلیو کې ۱۰۰ کورونه جوړ کړي.
په پکتیکا کې د افغاني سره میاشت ټولنې مشر مولوي الیاس ناصري وايي، د ژمي لپاره ۲ زره خېمو او همدا راز تودو جامو ته اړتیا لري.
په افغانستان کې د سږ کال زلزلې او ورسره سېلونه په داسې حال کې وو چې له وړاندې وچکالۍ سخت زیانونه پېښ کړي وو.