امريکايي چارواکي: له افغانستان د امريکا پر وړاندې ترهګريزو ګواښونو ته متوجې يو
طالبانو تازه په دې اړه د ازادي راډیو پوښتنې ځواب نهکړې خو وړاندې یې ویلي هيچاته به له افغانستانه د نورو هېوادونو پر ضد د ترهګریزو تحرکاتو او ګواښونو جوړولو اجازه ور نهکړي.
امریکا یو ځل بیا ټینګار کوي، چې له افغانستانه د دغه هېواد او متحدینو پر وړاندې یې د ګواښونو د مخنیوي موضوع څاري.
د سپینۍ ماڼۍ ویاندې کرین ژان پییر چې د سپټمبر په ۶مه نېټه ناوخته یوې خبري غونډې ته خبرې کولې ټینګار وکړ چې، دوی به پر طالبانو دا فشار هم راولي چې په افغانستان کې بشري حقونه مراعت کړي.
مېرمن پییر د بشري حقونو د رعایت د ټینګار تر څنګ پر طالبانو غږ وکړ چې، په افغانستان کې د تښتول شوي امریکایي وګړي مارک فریرکس د خوندي خلاصون لپاره دې بشري حقونه مراعت او اساسي ازادیو ته دې درناوی وکړي.
نوموړې وويل: "موږ به د متحده ایالاتو یا زموږ متحدینو ته د هر ډول ترهګریزو ګواښونو په وړاندې محتاط پاتې شو، هغه شان چې موږ په دې وروستیو کې د جولای په میاشت کې ښودلې، لکه څنګه چې تاسو پوهیږئ، موږ د القاعدې مشر وواژه، متحده ایالاتو ته به د خپلو افغان متحدینو انتقال جاري ساتو ځکه چې له هغوی سره زموږ ژمنې تلپاتې دي، نو موږ به پر طالبانو فشار ته دوام ورکړو چې د مارک فریکس په خوندي خلاصون او د ښځو او نجونو په ګډون د ټولو افغانانو بشري حقونو او بنسټیزو ازادیو ته درناوی وکړي."
امریکایي مارک فریریکس دوه کاله مخکې د ۲۰۲۰ کال د جنورۍ په ۳۱مه په کابل کې تښتول شوی و او باور دا دی چې په تښتولو کې یې د حقاني شبکې لاس و.
هڅه مو وکړه د سپینې ماڼۍ د ویاندې په اړه د طالبانو د حکومت نظر ولرو، خو ویاند یې ذبیح الله مجاهد په دې اړه زموږ پوښتنې ځواب نهکړې.
خو د طالبانو د حکومت ویاند ذبیح الله مجاهد وړاندې د امریکا چارواکو د ورته څرګندونو په اړه یې ویلي و چې، دوی به هيچاته له افغانستانه د نورو هېوادونو پر ضد د ترهګریزو فعالیتونو اجازه ور نهکړي.
دغه راز مجاهد د ښځو او نجونو د حقونو په اړه یې ویلي، د اسلامي شریعت او افغاني فرهنګ په رڼا کې یې د دوی حقونو خوندي کولو ته ژمن دي.
امریکا داسې مهال په افغانستان کې د ترهګرۍ ضد جدي پام خبره کوي، چې د دغه هېواد ولسمشر جو بایډن د اګسټ پر دویمه نېټه اعلان وکړ چې د تېرې جولای میاشت په ۳۱مه نېټه یې د پلازمېنې کابل شېرپور سیمه کې د بې پیلوټه الوتکې په برید کې د القاعدې ډلې مشر ایمن الظواهري وواژه.
هغه پېښه چې لا یې هم طالبان نه تأیید او نه یې هم ردوي.
طالبانو ویلي دوی په کابل کې د ایمن الظواهري له اوسېدو خبر نه و او تر اوسه یې هلته د برید په سیمه کې کوم جسد نهدی موندلی.
د ایمن الظواهري وژل کېدو وروسته له افغانستانه احتمالي ترهګریزو ګواښونو د امریکا په ګډون د اکثرو هېوادونو اندېښنې راپارولي دي.
بلخوا پرون سه شنبه د سپټمبر په ۶مه نېټه د بشري حقونو د څار نړیوال سازمان د افغانستان د جګړې په اړه د امریکا له ګومارل شوي کمېسیون څخه غوښتي چې، د افغان ښځو او نجونو د حقونو په اړه دې د امریکا د حکومت کړې ژمنې وڅېړي.
ياد سازمان ويلي دا دې معلومه شي چې، اوس د طالبانو تر واکمنۍ لاندې د افغان ښځو د حقونو د خوندي کولو لپاره متحده ایالات څه کولای شي.
طالبانو له یو کال له زیاتې مودې واکمنۍ راهیسې افغان ښځې له کار کولو منع او له شپږم ټولګیو پورته د نجونو زده کوونکو پر مخ د ښوونځیو دروازې تړلې دي.