پاکستان افغان سوداګرو ته د سوداګرۍ په برخه کې ځینې اسانتیاوې رامنځته کوي
د افغانستان د سوداګرۍ او پانګونې خونې د یکشنبې په ورځ ناوخته په یوې خپره کړې خبرپاڼه کې وویل چې د دې خونې مسؤلینو کابل ته د پاکستان د امنیت شورا د سلاکار په مشرۍ پلاوي سره په لېدنه کې د دې او ورته نورو مسایلو په اړه خبرې کړي دي.
په دې خبرپاڼه کې ویل شوي چې دواړو خواوو د راکړې ورکړې په یوې اسانه تګلارې، د افغانستان په ۱۸ قلمه صادراتي توکو د پاکستان له خوا د تعرفو معافول، د کرنې په برخه کې له افغانستان سره د پرمختللي ماشینرۍ مرستې، په بندرونو کې د سوداګرو په وړاندې د پرتو ستونزو د حل لپاره د یوې بنسټیزې لارې موندلو او دواړو خواو د یادو ژمنو دعملي کولو لپاره د یوې کمېټې په جوړولو ټینګار او هوکړه کړې.
په خبرپاڼه کې راغلي، له پاکستان نه د راغلي پلاوي سره په یادو مواردو هوکړه کولای شي د افغان سوداګرو ستونزې له دې وروسته کمې او په چارو اسانۍ رامنځته کړي.
دا په داسې حال کې ده چې له دې وړاندې تل افغان سوداګرو د پاکستان په بندرونو کې صادارتو او وارداتو په وړاندې د ستونزو خبره کړې ده.