طالبان: د هلمند، کندهار او ارزګان سېلابځپلو سیمو ته مو مرستندویه ډلې استولي
دې ولایتونو کې د وروستیو سختو ورښتونو وروسته زیان اړوونکي سېلابونه راوتلي وو.
د طالبانو د حکومت ویاند ذبیحالله مجاهد د پنجشنبې په ورځ ازادي راډیو ته وویل، د وضعیت د کابو کولو لپاره هڅې روانې دي.
مجاهد وویل: "مرسته رسوونکو ډلو ځانونه سیمې ته رسولي دي. انشاءالله د وضعیت د کنټرول په حال کې یو. که څه هم د تلفاتو کوم راپور نهشته، خو هغه کسان چې په سېلابونو کې بند پاتې وو، د هلیکوپټرو په وسیله ژغورل شوي دي."
له دې سره هممهاله د طالبانو د حکومت رئیسالوزرا د مرستیال ملا عبدالغني برادر په مشرۍ له پېښو سره د مبارزې کمېسیون په خپله غونډه کې ټولو ادارو ته دنده ورکړې چې د وروستیو ورښتونو له کبله زیانمنو شویو کورنیو ته دې مرسته ورسوي.