د خوست د سوداګرو مالونه له یوې نیمې میاشتې په ګمرک کې بند دي
دوی زیاتوي، په ګاډو کې ځیني داسې خوراکي توکي شته چې د کارونې وخت يې په پوره کېدو دی او که له دې زیات وځنډېږي، نو خرابېږي او سوداګرو ته به له دې کبله لسګونه میلیونه افغانۍ زیان ورسېږي.
دوی چې د شنبې په ورځ په یوه خبري ناسته کې راټول شوي وو، رسنیو ته وویل چې له ګمرک سره يې دا ستونزه پیدا شوې ده چې ګاډي د نوعیت پر اساس محصول کوي چې دا ډول محصول د اصولو خلاف او سوداګرو ته په زیان دی.
د دوی په وینا، ګمرک پرته له دې چې مالونه تشریح کړي، په سرجم ډول ګاډي دومره په لوړ قیمت محصول کوي چې په ګاډي کې مال په هغه اندازه نه وي.
سوداګرو ګواښ وکړ چې که غږ يې وانه ورېدل شي، نو ښار به وتړي او په پراخو مدني حرکتونو به لاس پورې کړي.
خو د ګمرک رئيس او نور مسؤلین یې په دې اړه د نظر څرګندولو ته حاضر نشول، خو ویې ویل چې دوی ته مالیې وزارت په رسمي او کتبي ډول لارښوونه کړې چې رسنیو سره دې نه غږېږي.