نړیوالو رهبرانو ته د بشري حقونو د څار نړیوال سازمان خبرداری ورکړ

د بشري حقونو د څارنې نړیوال سازمان یا هیومن رایټس واچ له نړیوالو رهبرانو غوښتنه کړې چې که د روسیې جمهور رئیس ولادیمیر پوتین په سوریه کې د ملکي وګړو د امنیت ټینګولو لپاره اقدام ونه کړي، په روسیه کې د فوټبال د نړیوال جام د سیالیو د پرانیستې په مراسمو کې دې له ګډونه ډډه وکړي.


روسیه به سږکال د فوټبال د نړیوال جام د سیالیو کوربه وي.


په سوریه کې د کورنۍ جګړې له پېل راهیسې ولادیمیر پوتین د بشار الاسد د رژیم ملاتړ کړی دی.


د بشري حقونو د څارنې نړیوال سازمان چې مرکز یې په نیویارک کې دی، نن سې شنبه په یوه بیان کې پر مسکو غږ کړی چې د سوریې د خلکو د کړاو په وړاندې د مسؤلیت احساس وکړي او سترګې دې نه ورباندې پټوي.