په پاکستان کې د افغان کډوالو د استوګنې موده ٣ مياشتې نوره هم وغزېده
له دې سره څه باندې ٢ مليونه افغان کډوال کولاى شي، د درېيو نورو مياشتو لپاره په پاکستان کې ژوند وکړي.
د پاکستان د حکومت يوه وياند شوکت اقداس وويل، په دې موده کې به د دغو کډوالو د ايستلو د پروسې پر چټکوالي کار وشي.
وروسته له هغې چې د پاکستان کابينې د روان ميلادي کال په لومړيو کې د جنورۍ تر پايه د ټولو افغان کډوالو د ايستلو پرېکړه وکړه، په دغه هېواد کې مېشت افغان کډوال له بې برخليک حالت سره مخامخ وو.
خو د جنورۍ تر پايه ورکړل شوى مهلت د مارچ مياشتې تر پاى پورې غزول شوى و.
تر دې مخکې افغان چارواکو او د کډوالو په چارو کې د ملګرو ملتونو د عالي کمشنرۍ په افغانستان کې د دغو کډوالو د مېشتېدنې په اړه اندېښنه ښوولې وه.