Русија му ја продолжи дозволата за престој на Сноуден до 2020 година
Како што соопшти портпаролот на руското МНР Марија Захарова за медиумите, дозволата за престој на Едвард Сноуден е продолжена до 2020 година. Претходно на својата страница на „Фејсбук“ таа напиша дека дозволата за престој на Сноуден „беше продолжена за две-три години“.
Поранешниот припадник на Агенцијата за национална безбедност (НСА) Едвард Сноуден во јуни 2013 година на новинарите им предаде информации за следењето на американските и британските разузнавачки служби. Поради скандалот во врска со тоа, Сноуден избега од САД преку Хонг Конг во Москва. Во Русија поранешниот припадник на НСА најпрвин доби привремен азил, а потоа дозвола за престој.
На својата објава на „Фејсбук“ Захарова го критикуваше предлогот на поранешниот заменик-шеф на ЦИА Мајкл Морел, кој 15 јануари напиша во колумна дека испорачувањето на Сноуден на САД би бил „прекрасен подарок“ од рускиот лидер Владимир Путин за инаугурацијата на Доналд Трамп.
Екс-заменик-директор на ЦИА: Путин треба да му го подари Сноуден на Трамп
Според мислењето на Захарова, предлогот на поранешниот заменик-директор на ЦИА е во суштина „идеологија на предавство“.
На предлогот на Морел се одѕва и рускиот адвокат на Сноуден Анатолиј Кучерена. Тој изјави дека амбасадата на САД сакала да го испрати Сноуден во САД како багаж. „На почетокот, веднаш штом Едвард Сноуден се најде во Русија, и штом станав негов адвокат, од мојата канцеларија практично не излегуваа претставниците на амбасадата на САД, кои ни нудеа да го пријавиме како некаков багаж, да го завиткаме во лентичка и да го испратиме во САД“, го цитира адвокатот агенцијата РИА „Новости“.
Претходно, во првата половина на јануари, бројот на потписи на петицијата на платформата pardonsnowden.org, која го повикува претседателот на САД Барак Обама да го помилува Сноуден, надмина еден милион. Сноуден им се заблагодари на своите поддржувачи, истакнувајќи дека „ова не е крајот на битката, туку само почеток на движењето“.
Белата куќа, меѓутоа, изјави дека поранешниот припадник на НСА не ги доставил потребните документи за помилување.