Костадиновски апелира за итен избор на уставен судија

Претседателот на Уставниот суд, Дарко Костадиновски, денеска упати апел до Судскиот совет итно да предложи кандидат за уставен судија, а до Собранието без одлагање да пристапи кон негов избор, предупредувајќи дека Судот веќе се соочува со сериозни потешкотии во работењето поради некомплетен состав.

„Веќе имаме проблеми. На вчерашната седница имавме не еден, три предмети во кои немавме мнозинство. Значи од заминувањето на колешката во мај месец, до денес мислам дека имаме десетина предмети кадешто немаме одлука. И повторно, неблагодарно е да ги квалификувам како важни или помалку важни. Сите наши одлуки се важни„, изјави Костадиновски.

На годишната прес-конференција, тој повика и на повисоко ниво на уставноправна култура кај политичките актери, со воздржување од поделби и етикетирања и со реална, а не декларативна посветеност на владеењето на правото.

Костадиновски информираше дека од заминувањето на една судијка во мај, Уставниот суд има десетина предмети во кои не е донесена одлука поради недостиг од мнозинство. Само на последната седница, како што рече, имало три предмети без потребното мнозинство за одлучување, нагласувајќи дека сите предмети што ги разгледува Судот се подеднакво важни.

Во однос на предметот за пензиите, Костадиновски појасни дека законите се поделени на последната седница и дека одлука ќе биде донесена веднаш по изборот на нов судија. Тој потенцираше дека поведувањето постапка не значи конечна одлука, бидејќи Уставниот суд одлучува во две фази, при што втората не секогаш завршува со укинување или поништување на закон.

Одговарајќи на прашања зошто Судот не постапил порано по сопствена иницијатива во случајот со пензиите, Костадиновски истакна дека последните законски измени биле оспорени со повеќе иницијативи и дека Судот постапувал по нив, додавајќи дека располага со механизми со кои може да ги коригира последиците од законите, без оглед на времето на одлучување.

Осврнувајќи се на измените на Кривичниот и Изборниот законик, Костадиновски оцени дека дел од државните органи не ги почитуваат роковите утврдени од Уставниот суд, но најави дека Судот е подготвен да воведе „уставна дисциплина“ преку своите одлуки. Тој посочи дека парламентот доцнел со постапување по повеќе предмети и најави дека следната година може да се очекуваат „многу поинакви одлуки“ од Уставниот суд.

Костадиновски нагласи дека, иако Уставниот суд е надвор од класичната поделба на власта, негова обврска е да ја контролира рамнотежата меѓу институциите и да не дозволи надмоќ на една власт врз друга.