Воениот лидер на Судан: војската е посветена на транзиција кон цивилна власт
Бурхан го објави ова во својот прв говор откако избувнаа брутални борби во Судан меѓу неговите сили и моќните паравоени сили во земјата пред речиси една недела.
„Уверени сме дека ќе го надминеме ова искушение со нашата обука, мудрост и сила, зачувувајќи ја безбедноста и единството на државата, што ќе ни овозможи да ни се довери безбедна транзиција кон цивилно владеење“, рече Бурхан во видео пораката објавена во петок наутро по повод муслиманскиот празник Рамазан Бајрам.
Изјавата на врховниот командант на суданската армија доаѓа откако неговите ривали објавија тридневен прекин на огнот за празникот со кој се одбележува крајот на Рамазан, светиот месец за муслиманите.
И Бурхан, кој ја презеде контролата врз земјата по државниот удар во октомври 2021 година, и неговиот ривал, командантот на паравоените „Сили за брза поддршка на Судан“ (РСФ), генерал Мохамед Хамдан Дагало, постојано ветуваа дека ќе ја доведат земјата до цивилно владеење.
Сепак, тие сè уште немаат потпишано политички договори со кои нивните институции би ја изгубиле моќта и би го отвориле патот за демократски избори.
Видео пораката е всушност првото појавување на Бурхан во јавноста по борбите што го зафатија Картум и околните области. АП пренесува дека не е познато кога и каде е снимено видеото.
На 20 април суданската армија ги отфрли преговорите со спротивставените сили, наведувајќи дека ќе прифати „само нивно предавање“.
Двете страни имаат долга историја на кршење на човековите права. РСФ произлезе од милицијата Џанџавид, која се соочи со обвинувања за широко распространети злосторства кога владата ги распореди за да го задуши бунтот во западен Судан во раните 2000-ти. Последниот конфликт ги зголеми стравувањата дека конфликтите може да се прелеат и во соседните африкански земји.