Иселенците од ЕУ лани испратиле 200 милиони евра во Македонија

Двесте милиони евра лани биле испратени од земјите членки на ЕУ како лични трансфери кон граѓани во Македонија, покажуваат податоците на Евростат. Во регионот најмногу пари како лични трансфери се регистрирани во Србија 2,96 милијарди евра, следат БиХ со 1,38 милијарди евра, Албанија 926 милиони евра, Косово 800 милиони евра, Турција со 670 милиони евра и Црна Гора со 228 милиони евра.


Најмногу пари од европските земји се излеани од Франција во износ од 11,4 милијарди евра, по што следат Шпанија со 7,7 милијарди евра, Велика Британија седум милијарди евра, Италија 6,5 милијарди евра и Германија 5,2 милијарди евра. Најголем прилив, пак, од земјите во ЕУ е забележан во Португалија 3,6 милијарди евра, Романија три милијарди евра и Полска 2,5 милијарди евра.


Податоците покажуваат дека на лични трансфери во 2018 година од ЕУ кон други земји кои не се членки се испратени 35,6 милијарди евра, што е зголемување на претходната година кога биле 32,6 милијарди евра. Најголем дел од овие лични трансфери се состојат од плаќања од мигранти во државите од ЕУ кон нивните земји на потекло.