Возач на „Дурмо турс“ тврди дека автобусите имале манипулатор на брзината

Автобусот на „Дурмо турс“ имал уред за манипулација на брзината и секој возач можел да го користи кога сака, кажа на денешното судење возач вработен во компанијата. На денешното судење за автобуската несреќата кај Ласкарци сведочеше Филип Наумовски, кој осум години работел во компанијата. Дента кога се случила несреќата автобусот го возеле тројца возачи, сведокот Наумовски, возачот Маноел Трифуновски кој го возел автобусот кога се случила несреќата, и уште еден возач Џемал. Сведокот кажа дека автобусот дента, цело време возел на една тахографска лента.


Наумовски рече дека во автобусот имало уред за манипулација, што бил поставен неколку месеци откако се вработил во „Дурмо турс“.


Претходно во сведочење и третиот возач рече дека имало вградено уред со кој се манипулирала брзината на движење на тахографската лента.


На едно од сведочењата пак, вработен во фирмата која го баждарела автобусот, рече дека тхографот на автобусот на Дурмо турс немал уред за манипулирање на брзината.



Сведокот вели дека не забележал ништо невообичаено кога го возел автобусот, а рече и дека неговиот колега Маноел не се пожалил на никакви здравствени или технички проблеми. И Наумовски се качил во автобусот кон Гостивар пред да се случи несреќата, но се симнал во

Ѓорче Петров. Кога разбрал за несреќата отишол на местото на несреќата.


„Кога стигнав, го видов Маноел и го прашав што се случи. Тој ми одговори „не знам што се случи”, рече Наумовски.



Сведокот рече дека претпоставените не ги контролирале тахографските ленти. Тој вели дека во автобусот имало копче за лажирање на брзината, кое требало да покажува за 12-13 километри помала брзина. Тоа било вградено во една фирма во Железара.

Појасни, дека знаел дека сите три автобуси на таа релација имаа таков уред.



За автобуската несреќа што се случи на 13 февруари годинава кај селото Ласкарци, во која загинаа 16 лица, а 37 беа потешко повредени обвинети се шест луѓе.