„Македонија оди во правилна насока и земјата ја има поддршката на Франција во интеграциските процеси, кои отвораат перспектива за економски и севкупен развој“, му порачал францускиот амбасадор Кристијан Тимоние на министерот Роберт Поповски на денешната средба, соопштија од Владата. Министерот за комуникации, отчетност и транспарентност Поповски и францускиот амбасадор Тимоние, разговарале за повеќе актуелни прашања, како финансирањето на претстојниот референдум, измените на Изборниот законик, договорите со соседите, перспективата на Македонија.
Двајцата соговорници се согласиле дека информирањето за референдумот, треба да биде базирано на принципите на објективност, транспарентност и рационалност. А за измените на Изборниот законик заклучиле дека треба да се земат предвид укажувањата на новинарските здруженија и медиумите, поврзани со дел од одредбите од Законикот кој се однесуваат на онлајн медиумите, порталите, соопштуваат од Владата.
