Кемин районунда Күн нурунан иштей турган электр станциясы курула баштады
Касымалиев Күн нурун бул багытта пайдалануу өлкөнүн энергетикалык көз каранды эместиги үчүн маанилүү экенин кошумчалады:
“Бул иш-чара биздин планета алдындагы жоопкерчилигибизди, жаратылышты сактоо жана ресурстарды сарамжал пайдалануу зарылдыгын тастыктайт”.
Адылбек Касымалиев долбоорду ишке ашырууга жардам берген кытайлык өнөктөштөргө, Шэнси провинциясынын өкмөтүнө жана инвесторлорго эки өлкөнүн кызматташтыгын өнүктүрүүгө кошкон салымы үчүн ыраазычылык билдирди. Ал Кыргызстанда жаңыланып туруучу энергиянын потенциалы зор экенин, аны туруктуу өнүктүрүү максаттарына жетүү үчүн колдонуу керектигин айтты.
Маалыматта айтылгандай, кубаттуулугу 100 МВт болгон станция жылына 155 млн кВт/саат электр энергиясын иштеп чыгуу менен көмүр кычкыл газын бөлүп чыгарууну 140 миң тоннага жана көмүргө болгон керектөөнү 50 миң тоннага азайтат. Ишкананы курууда 500гө жакын жумуш ордун түзүүгө мүмкүнчүлүк ачылат.
Буга чейин Энергетика министрлиги Нарындагы Семиз-Бел жана Кызарт аймактарында Күн жана шамал электр станциялары куруларын билдирген.
2023-жылы мартта президент Садыр Жапаров “Энергиянын жаңыланып туруучу булактарын пайдалануу үчүн багытталган жерлерди берүү маселелери жөнүндө” жарлыкка кол койгон. Анда Күн, шамал жана энергиянын жаңыланып туруучу башка да булактарын өркүндөтүү үчүн станция курууга бир катар жеңилдик берүү каралган. (КЕ)