Аксыда 51 жаштагы аялдын өлүмүнө күйөөсү шектелүүдө
Жараатынан улам аял эртеси саат 9:22де ооруканада жан берген. Дарыгерлер маалыматты райондук ички иштер бөлүмүнүн (РИИБ) нөөмөт бөлүмүнө кабарлашкан.
10-январда райондук милицияга маркумдун бир тууганы кайрылып, карындашынын өлүмүнө күйөөсүн айыптап, ага карата мыйзамдуу чара көрүүнү суранып, даттанган.
Бул иш Аксы РИИБнин бирдиктүү реестрине Кылмыш-жаза кодексинин 130-беренеси ("Ден соолукка оор залал келтирүү") менен катталып, кылмыш иши козголгон. Анын алкагында кылмышка шектүү катары маркумдун күйөөсү 51 жаштагы жаран кармалып, райондук милициянын убактылуу кармоочу жайына киргизилген.
Милиция бул иш боюнча тергөө амалдары жүрүп жатканын кабарлады.
2024-жылдын 31-декабрына караган түнү Баткен облустук биргелешкен ооруканасынын жандандыруу бөлүмүнө Суу-Башы айыл аймагынын 31 жаштагы тургуну (И.Ч. аял киши) денесинен жаракат алып түшкөнү тууралуу маалымат келген. Милициянын сурагы учурунда жабырлануучунун күйөөсү (32 жаштагы М.Б.) аялы менен пикир келишпестиктен уруша кеткенин билдирген.
Милиция келиндин абалы туруктуу орто экенин, ал өзүнө кол салганын, эч кимге арыз-доосу жок экенин айтканын жана тергөө амалдары жүргүзүлүп жатканын кабарлаган. 6-январда баткендик блогер Батмакан Жолболдуева Фейсбуктагы баракчасына дарыгер келинди жолдошу бычактап салганын жазып, күйөөсүнө чара көрүүнү талап кылган.
Соңку жылдары Кыргызстанда аялдарга жана балдарга каршы үрөй учурган зомбулук фактылары катталууда.
Ички иштер министрлигинин (ИИМ) маалыматына ылайык, Кыргызстанда 2024-жылдын 10 айында ички иштер органдарынын маалыматтарды каттоо электрондук журналына 14 293 үй-бүлөлүк зомбулук фактысы катталган. Бул 2023-жылдын ушул мезгилине салыштырмалуу 37,2% же 3 877 учурга көп (былтыр 10 айда 10 416 факты катталган).
Былтыркы жылдын 12 айы боюнча маалымат азырынча чыга элек.(TB/ZKo)