Астанада 254 жалдамалы пәтер үлестіріледі: кезекте тұрғандар қай жерден баспана алады?
Астанада жалдамалы пәтерлерді бөлудің жаңа кезеңі басталады. Бүгін, 2026 жылғы 8 қыркүйекте, кезекте тұрғандарға 1414 нөмірінен SMS-хабарлама келуі тиіс. Tengri Home баспана қай жерден берілетінін және кімдер жеңілдікпен жылжымайтын мүлікке ие бола алатынын баяндайды.
Астанада жалдамалы пәтерлер қай жерден беріліп жатыр?
"Бүгін 254 азаматқа 1414 нөмірінен SMS-хабарлама жіберілді", - деп хабарланды 2026 жылғы 8 қыркүйекте Тұрғын үймен қамтамасыз ету орталығының Instagram-дағы orken.otbasybank ресми аккаунтында.
SMS алғандардың барлығы келесі тұрғын үй кешендерінен жалдамалы пәтер таңдай алады:
"Рио-де-Жанейро" ТҮК, 25/3 үй - 23 пәтер;
"Рио-де-Жанейро" ТҮК, 25/2, 25/4 үйлер - 36 пәтер;
"Мирный" ТҮК - 149 пәтер;
"Aspan Park 2" ТҮК, 8 үй - 16 пәтер;
"Aspan Park" ТҮК, 8/1 үй - 30 пәтер.
1414 нөмірінен SMS келді: ары қарай не істеу керек?1414 нөмірінен хабарлама алған соң, электрондық цифрлық қолтаңба (ЭЦҚ) арқылы "Баспана маркет" порталындағы жеке кабинетке кіру қажет. Ол жерде жалдамалы пәтерлер туралы барлық ақпаратты көруге болады.
"Осыдан кейін инвентаризация рәсімінен өту керек. Бұл кезеңде табыс деңгейіңіз тексеріледі. Егер тексерудің барлық кезеңінен сәтті өтсеңіз, ұсынылған пәтерді қабылдай аласыз немесе одан бас тартуыңызға болады", - деп нақтылады орталық өкілдері.
Ұсынылған нұсқаға келісім беру немесе бас тарту бес жұмыс күні ішінде жүзеге асырылуы тиіс.
Кімдер жалдамалы баспанаға үміткер бола алады?Үміткерлердің кейінгі бес жыл ішінде меншігінде баспанасы болмай, кезекте тұруы тиіс. Тұрғын үй кешеніндегі жалдамалы пәтерлердің 70 пайызы халықтың әлеуметтік осал топтарының сегіз санатына жататын кезектегілер арасында бөлінеді:
Ұлы Отан соғысының ардагерлері;
Жеңілдіктері бойынша Ұлы Отан соғысының ардагерлеріне теңестірілген ардагерлер;Басқа мемлекеттердің аумағындағы ұрыс қимылдарының ардагерлері;Бірінші және екінші топтағы мүгедектігі бар адамдар;
Мүгедектігі бар балаларды асырап отырған немесе тәрбиелеп отырған отбасылар;Тұл ерлер мен жесір әйелдер;
"Алтын алқа", "Күміс алқамен" марапатталған немесе бұрын "Батыр ана" атағын алған, сондай-ақ I және II дәрежелі "Ана даңқы" ордендерімен марапатталған көпбалалы аналар, көпбалалы отбасылар;Жетім балалар, ата-анасының қамқорлығынсыз қалған балалар (оларға ТК-дегі пәтерлердің жалпы санының 20 пайызы беріледі).
Тұрғын үй кешендеріндегі пәтерлердің қалған 30 пайызы кезекте тұрған басқа адамдар арасында бөлінеді. Кезекті orken.otbasybank.kz сайтындағы "Есепте тұрған азаматтардың тізімі" бөлімінен тексеруге болады.