АҚШ-тың Иранға жасаған жаңа соққылары фонында мұнай бағасы шарықтады
Сейсенбі күні АҚШ Иран нысандарына жаңа соққылар жасай бастаған соң және Америка көшбасшысы Дональд Трамп егер Тегеран тарапынан қарымта әрекеттер болса, елге бұдан да қуатты соққы жасалатынын ескерткеннен кейін әлемдік мұнай бағасы күрт өсті, деп хабарлайды Tengrinews.kz.
Сауда-саттық мәліметтеріне сәйкес, WTI маркалы мұнай 5,2 пайызға қымбаттап, барреліне 90,22 долларды құрады. Бұл – 23 шілдеден бергі сауданың жабылу кезіндегі ең жоғары баға.
Brent маркалы мұнайдың құны 4,6 пайызға өсіп, барреліне 94,65 долларға жетті.
Бұған дейін сейсенбіде АҚШ Орталық қолбасшылығы (CENTCOM) американдық әскерилердің Ирандағы Ислам революциясы сақшылар корпусының (ИРСК) нысандарына соққы жасай бастағанын хабарлады.
ИРСК ресми өкілі Хосейн Мохеби АҚШ-ты қатаң жаза күтіп тұрғанын және олардың жаңа соққылар үшін өкінетінін мәлімдеді. Трамп Truth Social әлеуметтік желісінде тиісті жазба жариялап, Тегеранға американдық әскерилердің әрекетіне жауап қайтарылған жағдайда, шабуылдың бұдан да ауқымды болатынын ескертті.
БАҚ мәліметінше, шабуылдар Иранның оңтүстік жағалауындағы бірнеше нысанға, соның ішінде Бендер-Аббастағы әскери базаға, Кешм аралындағы нысанға, сондай-ақ Сирик пен Джаскідегі нысандарға жасалған.
Жексенбі күні, 30 тамызда, АҚШ Ормуз бұғазындағы Ларак аралында орналасқан Иранның екі зымыран қондырғысына соққы жасады. Бұл – шілде айының соңынан бері АҚШ-тың Ислам Республикасына жасаған алғашқы шабуылы. Бұған жауап ретінде Иран дүйсенбі күні Иорданиядағы америкалық әскери нысандарға қарай кемінде сегіз баллистикалық зымыран ұшырды.