Алматылық фармацевт қылмыстық топ үшін күшті әсер ететін заттарды өткізу арнасын ұйымдастырған
ІІМ мәліметінше, Алматыдағы дәріханалардың бірінің фармацевті өзінің заңды қызметінің мүмкіндіктерін пайдаланып, Ақтөбе облысына күшті әсер ететін заттардың ірі партияларын жеткізуді ұйымдастырған.
Топ құрамында ұйымдастырушы, оператор, өлшеп-ораушылар және заттарды жасырын орындар арқылы таратумен айналысқан адамдар болған.
Жедел-тергеу іс-шаралары барысында құқық қорғау органдарының қызметкерлері қылмыстық топтың барлық мүшесін ұстады.
Заңсыз айналымнан мыңнан астам дәрілік препарат тәркіленді.
ІІМ 2026 жылғы 1 қаңтардан бастап Қазақстанда күшті әсер ететін заттардың заңсыз айналымы үшін қылмыстық жауапкершілік енгізілгенін еске салды.
"Күшті әсер ететін заттардың заңсыз айналымы 15 жылға дейін бас бостандығынан айыру түріндегі қылмыстық жауапкершілікке әкеп соғады", – деді ІІМ Есірткі қылмысына қарсы іс-қимыл комитеті басқарма бастығының орынбасары Данияр Аубакиров.
Еске сала кетейік, бұған дейін ҰҚК Шекара қызметі елге аса ірі мөлшерде есірткі заттарын әкелудің бірнеше әрекетіне тосқауыл қойған болатын. Есірткіні Оңтүстік-Шығыс Азия елдерінен Алматы әуежайына келген рейстердің жолаушылары тасымалдаған.