ҚМА Мәсімовтің бұрынғы күйеу баласына қатысты істің егжей-тегжейін ашты
Қаржылық мониторинг агенттігі 2024 жылғы тамызда іздеу жарияланған "ҚазТемірТранс" АҚ бұрынғы вице-президенті Азамат Қапеновке қатысты тергеу амалдары туралы мәлімдеді, деп хабарлайды Tengrinews.kz.
Миллиардтаған шығын
Тергеу мәліметтері бойынша, Қапенов қызметтік жағдайын пайдалана отырып, жүк вагондарын басқару қызметтерін көрсету кезінде байланысы бар компанияларға заңсыз артықшылықтар жасаған.
"Қазіргі уақытта А.А. Қапенов халықаралық іздеуге жарияланған. Сотпен оған қатысты "қамауда ұстау" түріндегі бұлтартпау шарасы санкцияланған. Келтірілген залалды өтеу және заңсыз алынған активтерді қайтару мақсатында Бас көлік прокуратурасы "Достық" станциясындағы терминалды сотқа дейін тәркілеу туралы өтініш жолдаған", - деп хабарлады ҚМА.
Астана қаласының қылмыстық істер жөніндегі ауданаралық сотының қаулысы бойынша аталған мүлік мемлекет кірісіне өткізілді. Тергеу жалғасып жатыр.
ҚР Қылмыстық-процестік кодексінің 201-бабына сәйкес өзге ақпарат жария етуге жатпайды.
ҚМА мәліметінше, мүлікті тәркілеу Қазақстан Республикасының көлік-логистикалық әлеуетін дамыту тұжырымдамасын іске асыруға ықпал етеді.
Азамат Қапенов туралы не белгілі?
Азамат Қапенов 1978 жылы 12 сәуірде туған, Ресей азаматы. Бұқаралық ақпарат құралдарында ол Кәрім Мәсімовтің бұрынғы күйеу баласы ретінде көрсетілген.
2024 жылдың тамызында Сыбайлас жемқорлыққа қарсы іс-қимыл қызметі Қапенов туралы ақпарат бергендерге сыйақы тағайындаған болатын. Ол кезде оған алаяқтық күдігімен іздеу жарияланғаны хабарланған еді.