Ғылым мен мал шаруашылығына бөлінген миллиардтар тиімсіз жұмсалған - Қаржы мониторингі агенттігі
Қазақстандағы мал шаруашылығына бөлінген субсидиядан 30 млрд теңге тиімсіз пайдаланылған. Ғылыми зерттеулер мен ғылыми-техникалық нәтижелерді коммерцияландыруға арналған 10 миллиардтан аса теңге мақсатсыз жұмсалған. Бұл туралы Қазақстан президенті Қасым-Жомарт Тоқаевтың қабылдауында болған қаржылық мониторинг агенттігінің төрағасы Жанат Элиманов мәлімдеді.
Бұған қоса, елде міндетті әлеуметтік медсақтандыру қаражатын жымқыру бойынша 14 іс тергелген. Құрылыс саласында 5,3 млрд теңгені заңсыз иемдену бойынша 21 қылмыстық іс қозғалған.
Элиманов алаяқтық әрекеттерді алдын алу бойынша 17 қаржы пирамидасының қызметі тоқталып, алаяқтыққа қатысы бар 3,7 мың сайт пен 22 чат жабылды дейді. Заңсыз рәсімделген 68 мыңнан аса карта бұғатталғаны айтылды.
Агенттік басшысы жалған компаниялар мен құжаттарды пайдалану фактісі бойынша залалы 13 млрд теңге болатын 23 іс тіркелді деді.
Ақорда мен қаржылық мониторинг агенттігі жыл басынан бері қаржы саласындағы заң бұзу фактілеріне байланысты үлкен мәлімдемелер жасап келеді.
Мәселен 28 қаңтарда Тоқаев қаржы мониторинг агенттігіндегі жиында "Жақында [Қаржы мониторинг агенттігінің] төрағасы [Жанат] Элиманов қазақстандық банктердің бірі арқылы былтыр көршілес елден басқа мемлекеттерге 7 триллион теңгеден астам қаржы "жөнелтілгені" туралы баяндады" деген еді. Бірақ Тоқаев бұл ақшаның қай елге шығарылғанын айтпаған. Артынша президенттің бұл сөзі Ақордадан және басқа да сайттардан жоғалып кеткен.
Кейін елдегі банктердің трансшекаралық операцияларын тексеру басталған. Артынша Қазақстандағы "Халық банк", "Алтын банк", "Отбасы банк", "Хоум кредит банк", "Еуразиялық банк", Alatau City Bank, Bank RBK, ForteBank, "Центр Кредит банк", "Нұрбанк" және "Фридом банк" шетелге "7 трлн теңге жібермегендерін" мәлімдеді. 19 ақпанда Ұлттық банк төрағасының орынбасары Берік Шолпанқұлов "Ұлттық банк әзірге заңсыздық таппады" деген еді. 20 ақпанда Шолпанқұловтың өз еркімен қызметтен кеткені хабарланды.