NASA Жердің таңғажайып суреттерін жариялады
Artemis II басқарылатын ғарыш миссиясының экипажы иллюминатор арқылы түсірген мына бір суретте Жердің түн мен күнді бөліп тұратын терминатор деп аталатын шекарасы бейнеленген.
Тағы бір суретте планетамыздың жиегін күн сәулесі нұрландырып тұрғанын көруге болады.
Үшінші суретте Жер толығымен көк және қоңыр түстің реңктерінде көрінеді. Сондай-ақ поляр шұғыласының жасыл түсті жарқылы байқалады.
"Планета бозғылт көк түсті, ақ бұлттар мен шағылысқан жарықтан пайда болған нәзік көгілдір шұғыла көрінеді. Сағат тілімен шамамен "8 бен 9 арасындағы" секторда үлкен қоңыр алқап - Африка, ал планетаның иінінде Пиреней түбегінің оты жыпылықтайды. Сағат "1 тұсында" беткі қабаттан сәл бөлінген поляр шұғыласының жіңішке жасыл жарқылы байқалады. Жер қап-қара ғарыш аясында орналасқан", - деп сипаттайды бұл суретті NASA.
Instagram-дағы бұл жарияланымды көру
NASA (@nasa) жарияланымы
Artemis II - бұл NASA-ның Artemis бағдарламасы аясындағы алғашқы басқарылатын миссия. Осы жоба шеңберінде ғарышкерлер "Аполлон" бағдарламасынан бері алғаш рет Айға аттанады. Экипаж Айды қонбастан айналып өтіп, Жерге оралады. Негізгі міндет - болашақта Жер серігінің бетіне қону миссияларының алдында тіршілікті қамтамасыз ету жүйелері мен ұшу қауіпсіздігін тексеру.
Бұған дейін 1 сәуірде Флоридадағы Канаверал мүйісінен "Орион" ғарыш кемесінің бортында төрт ғарышкер отырған Artemis II басқарылатын ай миссиясы сәтті ұшырылғаны айтылды.
Экипаж құрамында - Рид Уайзман, Джереми Хансен, Кристина Кох және Виктор Гловер бар. Гловер - ай миссиясына қатысқан алғашқы афроамерикалық, ал Кох - алғашқы ғарышкер әйел болды. Олар 10 күн ішінде Айды айналып ұшып, Жерге оралуға тиіс.