Неге ыстық шайға лимон салуға болмайды?

Шай – көпшілік сүйіп ішетін үйреншікті сусын. Ол шөлді жақсы басады, жылытады әрі тыныштандырады. Кейбіреулер сусынға лимон тілімін қосады. Алайда цитрустың пайдасын алғыңыз келсе, кейбір ережелерді ескерген жөн, - деп хабарлайды Tengrinews.kz тілшісі belnovosti.by сайтына сілтеме жасап.
Есте сақтау керек: лимон құрамындағы барлық дәрумен, соның ішінде аскорбин қышқылы, қайнаған сумен жанасқанда бұзыла бастайды.

"Мұндай қоспасы бар ыстық сусын ауыз қуысындағы қышқылдық деңгейін айтарлықтай арттырады. Соның салдарынан тіс эмалі зақымдалады", - дейді мамандар.

Сондықтан лимон тілімін міндетті түрде ыстық емес, жылы шайға салу қажет. Тек осы жағдайда ғана оның пайдасын көруге болады.
Сонымен қатар, лимон шайға тек айқын дәм мен хош иіс беріп қана қоймай, ағзаны сергітеді. Осы себепті кешкі уақытта шайға цитрус қоспау керек, әйтпесе ұйқысыздыққа әкелуі мүмкін.