Атырауда үш адам үйдегі газдан уланып қайтыс болған
Атырау қаласындағы Томарлы ауылында үш адам газдан иіс тиіп көз жұмған. Бұл туралы облыстық төтенше жағдайлар жөніндегі департаменті хабарлады.
Төтенше жағдайлар қызметінің дерегінше, 67 жастағы ерлі-зайыпты екі адам және 72 жастағы ер адамның қазасына газбен жылитын тұрғын үйдегі пешті пайдалану талаптары орындалмауы себеп болуы мүмкін деген алдын ала болжам бар. Қазіргі кезде полиция қайғылы оқиғаның жай-жапсарын анықтап жатыр. Сот-медициналық сараптама тағайындалған.
Атырау облыстық төтенше жағдайлар департаменті халықты газ жабдықтарын пайдаланған кезде қауіпсіздік талаптарын қатаң сақтауға шақырды.