Әлемнің қай елдерінде өлім жазасы жиі қолданылады?
2018 жылы өлім жазасы деректері үш есеге азайған. Бұл туралы Amnesty International құқық қорғау ұйымы зерттеу нәтижелерін сайтында жариялады.
Зерттеу мәліметінше, 2018 жылы кемінде 690 адам өлім жазасы арқылы өлтірілген. Баяндамада мұның соңғы он жылдағы ең төменгі көрсеткіш екені айтылады.
"Әлемде өлім жазасына кесу шарасы кенеттен қысқарған, яғни бұл дегеніміз біз күткен елдердің өзінде басқа жолдарын қарастырып, осы шара арқылы барлық мәселені шешпейтінін аңғаруға болады", - деді ұйымның бас хатшысы Куми Найду.
Өлім жазасына кесу бойынша көшбасшы елдер қатарында Қытай, Иран, Сауд Арабия, Вьетнам және Ирак сынды мемлекеттер бар. Алайда осы зерттеу нәтижесінде Қытай мәліметтері есептелмеген. Өйткені Қытайда мыңдаған өлім жазасы шарасы мемлекеттік құпия ретінде қаралады екен.
Сондай-ақ, Иран, Ирак, Пәкістан жәге Сомалиде өлім жазасына кесу деректері азайған. Мысалы, Иранда 50 пайызға азайыпты. Ал Беларусь, Жапония, Сингапур, Оңтүстік Судан және АҚШ-та бұл көрсеткіш өскен.
Баяндамада БҰҰ-ға кіретін 193 елдің 106-сы өлім жазасын толықтай алып тасталғаны, ал 36 мемлекетте мүлде қолданылмайтыны айтылады.
Amnesty International мәліметінше, 2017 жылы 993 адам өлім жазасына кесілген, ал 2016 жылы - 1032 адам. Өлім жазасына кесілген адамдардың 27 пайызы есірткі саласы бойынша кінәлі деп айыпталған.