Өзім аман болайын
Бәрі де туысқан болғысы келіп қалыпты, бауырыма кірін өліп барады. Шіркін-ай, десеңізші. Мен дегенде анжырланып қатқан мұзы еріп кеткен болар ма? Еметайы езіліп бара жатқандай сәлем берейік деп едік дегенін қайтерсіз. Әлгі бір Еркін деген бала мен бастық болмай тұрып туысқан болып келіп жүруші еді. Одан басқа туысқанды бұрын көрсем мына қуанған маңдайымдағы бадырайған екі көзім ағып түссін! Енді міне, әне жерден де, міне жерден де «Мен Қоқаңның туысқанымын» деп сопаң-сопаң етіп шыға берді, шыға берді. Мейлі олар не десе о десін, мен де оларға артық бірдеме арқалатып жібергенім жоқ, әдемі жылдыртпа сөзбен тілімді емізіп шығарын салып жүрмін. Қайтем соларды, өзім аман болайын!