მარკო რუბიო: ტრამპისა და პუტინის შეხვედრა მოლაპარაკებაზე მიღწეულ პროგრესზეა დამოკიდებული
ჟურნალისტ კეტრინ ჰერრიგთან ინტერვიუში, მარკო რუბიო შეეხო საუდის არაბეთში 18 თებერვალს გამართულ შეხვედრას რუსეთის საგარეო საქმეთა მინისტრ სერგეი ლავროვთან, რომლისთვისაც აშშ-ის სახელმწიფო მდივანს მკაფიოდ უთქვამს, რომ ტრამპისა და პუტინის შეხვედრა არ შედგება, თუ არ იქნება მომზადებული და არ იქნება გარკვეული მასზე განსახილველი საკითხები.
"თუ ომის დასრულებასთან დაკავშირებით იქნება პროგრესი და ასეთ შეხვედრაზე მიღწეული იქნება შეთანხმება, მაშინ ვფიქრობ, რომ ყველა მიესალმება პრეზიდენტ ტრამპს, როგორც მშვიდობისმყოფელს", - განაცხადა მარკო რუბიომ.
ელ-რიადში გამართულ მოლაპარაკებებზე რუსეთი და შეერთებული შტატები შეთანხმდნენ, რომ შექმნიან ჯგუფებს, რათა განიხილონ 2022 წლის თებერვალში რუსეთის მიერ უკრაინის წინააღმდეგ დაწყებული ფართომასშტაბიანი ომის დასრულების გზები. პუტინმა და ტრამპმა განაცხადეს, რომ სურთ სამიტის ჩატარება.
ინტერვიუში, რომელიც სოციალურ ქსელ X-ში გავრცელდა, რუბიომ ასევე განაცხადა, რომ რიადში გამართულ შეხვედრაზე არ განუხილავთ რუსეთსა და უკრაინას შორის შესაძლო სამშვიდობო შეთანხმების კონკრეტული პარამეტრები. არ განხილულა არც სანქციების მოხსნა. რუბიოს თქმით, მთავარი მიზანი იყო იმის გაგება, მართლა აქვს თუ არა რუსეთს გადაწყვეტილი მშვიდობის მიღწევა. აშშ-ის სახელმწიფო მდივანმა განმარტა, რომ უკრაინა იმის გამო არ იყო მიწვეული, რომ შეხვედრა დიდწილად მიეძღვნა რუსეთისა და შეერთებული შტატების ორმხრივ ურთიერთობებს.
სახელმწიფო მდივანმა რუსეთს უწოდა "გლობალური ძალა", რომელთანაც აუცილებელია დიალოგის შენარჩუნება, სურს ეს ვინმეს თუ არა. მან გაიხსენა, რომ შეერთებულ შტატებსა და სსრკ-ს ურთიერთობა „ცივი ომის“ ყველაზე უარეს წლებშიც კი არ გაუწყვეტიათ.
საუდის არაბეთში გამართულ მოლაპარაკებაზე აშშ-ისა და რუსეთის დელეგაციები შეთანხმდნენ, „შეიქმნას საკონსულტაციო მექანიზმი აშშ-რუსეთის ურთიერთობებში "გამაღიზიანებლების" აღმოსაფხვრელად“, წლების განმავლობაში მიმდინარე დაძაბულობის შემდეგ.
მოლაპარაკების შემდეგ რუსეთის საგარეო საქმეთა მინისტრმა სერგეი ლავროვმა თქვა, რომ მხარეები „პრაქტიკულად შეთანხმდნენ“, რომ უნდა გადაჭრან დიპლომატიური მისიების ფუნქციონირებასთან დაკავშირებული საკითხები.
რაც შეეხება უკრაინას, მან აღნიშნა, რომ არსებობს გადაწყვეტილებების პოვნის „ორმხრივი სურვილი“ და რუსეთი დაელოდება შეერთებული შტატების წარმომადგენლების დანიშვნას.