აშშ იძიებს ისრაელის მხრიდან ირანზე საპასუხო დარტყმისთვის მზადების შესახებ საიდუმლო დოკუმენტების გაჟონვას
დოკუმენტები, რომლებიც 15 და 16 ოქტომბრითაა დათარიღებული, პირველად 19 ოქტომბერს გამოჩნდა ტელეგრამის აპლიკაციაზე. მათ ადევს "მკაცრად გასაიდუმლოებულის" გრიფი და აქვთ ნიშნები, რომელთა თანახმადაც მათი გაცნობა მხოლოდ აშშ-ის, ავსტრალიის, კანადის, ახალი ზელანდიის და ბრიტანეთის წარმომადგენლებს შეუძლიათ - იუწყება ტელეკომპანია CNN-ი.
დოუკუმენტები, როგორც ჩანს, აღწერს ისრაელის სამხედრო მზადებას ირანზე თავდასხმისთვის. ერთ-ერთ დოკუმენტში აღნიშნულია, რომ მასალა მომზადებულია აშშ-ის სახელმწიფო სივრცული სადაზვერვო სააგენტოს (NGA) მიერ.
წარმომადგენელთა პალატის სპიკერმა, რესპუბლიკელმა მაიკ ჯონსონმა CNN-თან ინტერვიუში დაადასტურა, რომ გამოძიება დაწყებულია და ამ საკითხზე ბრიფინგი მალე გაიმართება.