დაბომბვის შედეგად შვიდი სამოქალაქო პირი დაიღუპა ხერსონის ოლქში
შვიდი სამოქალაქო პირი, მათ შორის ჩვილი ბავშვი და 12 წლის ბიჭი, დაიღუპა ხერსონის რეგიონში დაბომბვის დროს. დაღუპულთაგან ხუთნი - ერთი ოჯახის წევრები იყვნენ. რამდენიმე დასახლებაში დაზიანებულია საცხოვრებელი კორპუსები, წერს ხერსონის ოლქის სამხედრო ადმინისტრაცია ტელეგრამში გამოქვეყნებულ ცნობაში. დაბომბვების შედეგად კიდევ ექვსი ადამიანია დაშავებული.
დაბომბვა ასევე დაფიქსირდა ზაპოროჟიეს ოლქის სამხრეთში მდებარე ქალაქ ნიკოპოლის გარშემო მდებარე სამოქალაქო რაიონებში. ადგილობრივი ხელისუფლების ცნობით, მსხვერპლის შესახებ ინფორმაცია არ დაფიქსირებულა მას შემდეგ, რაც „დაახლოებით ათი ჭურვი“ ჩამოვარდა ნიკოპოლსა და ქალაქ ჩერვონოგრიგორევკაში.
13 აგვისტოს უკრაინის გენერალური შტაბი ყოველდღიურ ანგარიშში იტყობინება, რომ უკანასკნელი დღე-ღამის განმავლობაში 39 შეტაკება მოხდა ხარკოვის რეგიონის აღმოსავლეთ ნაწილში, დონეცკის ოლქის დასავლეთ ნაწილში და ზაპოროჟიეს ოლქის რობოტინოს რაიონში.
ვადიმ როგოვმა, უკრაინის ზაპოროჟიეს ოლქის ოკუპირებულ ნაწილში რუსეთის მიერ დანიშნულმა საოკუპაციო ჩინოვნიკმა, თქვა, რომ უკრაინის ჯარებმა რუსული ხაზები გაარღვიეს და დონეცკის რეგიონის სამხრეთ-დასავლეთ ნაწილში მდებარე უროჟაინოეს დასახლებაში „მოიკიდეს ფეხი“. როგოვის თქმით, უკრაინის ძალები ცდილობენ კონტროლი დააწესონ ახლომდებარე ქალაქ სტარომლინოვკაზე.
ამასობაში რუსეთის თავდაცვის სამინისტრომ განაცხადა, რომ „ჩაშალა“ უკრაინის ძალისხმევა, რომლის მიზანი იყო „რუსეთში ობიექტებზე ტერორისტული თავდასხმების განხორციელება“. სამინისტროს განცხადებით, სამი უკრაინული დრონი ჩამოაგდეს ბელგოროდის ოლქში, კიდევ ერთი - კურსკის ოლქში. მსხვერპლისა და ნგრევის შესახებ ინფორმაცია არ გავრცელებულა.