WSJ: აშშ აპირებს, უკრაინას გადასცეს გაღარიბებული ურანის შემცველი სატანკო ჭურვები
წყაროს ცნობით, Abrams-ის ტანკების აღჭურვის შესახებ დისკუსია უკანასკნელი რამდენიმე კვირის განმავლობაში მიმდინარეობს. პენტაგონი გამოვიდა მოწოდებით, უკრაინას გაეგზავნოს გაღარიბებული ურანის შემცველი ჭურვები, რომლებსაც რეგულარულად გამოიყენებენ აშშ-ის არმიაში და რომლებიც ეფექტიანია რუსული ტანკების წინააღმდეგ. როგორც აღნიშნავენ, ამ ჭურვებს შორი მანძილიდან შეუძლიათ შეაღწიონ რუსული ტანკის ფრონტალურ ჯავშანში.
წინადადება თეთრ სახლში განიხილებოდა. ზოგიერთმა ოფიციალურმა პირმა გამოთქვა შეშფოთება, რომ ჭურვების გაგზავნას შესაძლოა მოჰყვეს ვაშინგტონის მისამართით კრიტიკა ისეთი იარაღის მიწოდებისთვის, რომელიც შეიძლება ჯანმრთელობისა და გარემოსთვის საფრთხეს შეიცავდეს.
ბაიდენის ადმინისტრაციის მაღალჩინოსნებმა განაცხადეს, რომ აშშ-ის მიზანია, უკრაინას ბრძოლის ველზე რაც შეიძლება მეტ წინსვლაში დაეხმაროს, რათა კიევს მოლაპარაკებებში ძლიერი პოზიცია ჰქონდეს, თუ საბოლოოდ სამშვიდობო მოლაპარაკებები გაიმართება. მაგრამ ადმინისტრაციაში განხეთქილება გაჩნდა იმის თაობაზე, თუ როგორ უნდა დაეხმარონ უკრაინის არმიას, მათ შორის, მიაწოდონ თუ არა კასეტური ჭურვები.
უკრაინის შეიარაღებული ძალებისთვის 31 ერთეული ტანკი Abrams-ის გადაცემის გადაწყვეტილება ვაშინგტონმა მიმდინარე წლის იანვარში მიიღო. გაღარიბებული ურანის შემცველ ჭურვებს ჩვეულებრივ ჭურვებზე უკეთესი ჯავშანგამტანობა აქვს. გაღარიბებული ურანი არის ურანის გამდიდრების პროცესის ნარჩენები. მისი გამოყენება შესაძლებელია ბირთვული იარაღის წარმოებაშიც.
მანამდე უკრაინამ ამ ტიპის ჭურვები უკვე მიიღო დიდი ბრიტანეთისგან - ბრიტანული ტანკების, Challenger 2-ების აღსაჭურვად. მაშინ რუსეთმა ამ ნაბიჯს „კონფლიქტის სერიოზული ესკალაცია“ უწოდა. „ეს არის ფართოდ გავრცელებული ტიპის საბრძოლო მასალა, რომელიც ათწლეულების განმავლობაში გამოიყენებოდა მისი ჯავშანგამტანი თვისებების გამო,“ თქვა საპასუხოდ აშშ-ის ეროვნული უშიშროების საბჭოს წარმომადგენელმა ჯონ კირბიმ და ხაზგასმით აღნიშნა, რომ ეს ჭურვები არ არის რადიოაქტიური და არ განეკუთვნება ბირთვულ იარაღს.