პარლამენტთან ენმ-ის ორგანიზებული აქცია მიმდინარეობს
თბილისში, რუსთაველის გამზირზე პარლამენტის წინ პარტია "ერთიანი ნაციონალური მოძრაობის" მიერ ორგანიზებული აქცია მიმდინარეობს. აქცის სლოგანია - "ერთად ევროპაში".
"ნაციონალური მოძრაობის" ახალგაზრდული ფრთის წარმომადგენლები პარლამენტის წინ მიმდინარე აქციას მეტროს სადგურ "რუსთაველის" მიმდებარე ტერიტორიიდან მსვლელობით უერთდებიან. აქციას ესწრებიან "ნაციონალური მოძრაობის" წარმომადგენლები და მხარდამჭერები საქართველოს რეგიონებიდან.
აქციის მთავარი მოთხოვნებია ევროკავშირის 12 მოთხოვნის შესრულება, ექსპრეზიდენტ მიხეილ სააკაშვილის გათავისუფლება, ტელეკომპანია "მთავარი არხის" გენერალური დირექტორის ნიკა გვარამიას და 7-9 მარტის აქციებზე "მოლოტოვის კოქტეილის" სროლისა და პოლიციელის მანქანის დაწვის ბრალდებით დაკავებული 21 წლის ლაზარე გრიგორიადისის გათავისუფლება.
რუსთაველის გამზირზე უკვე გადაკეტილია საავტომობილო გზა. ადგილზე მობილიზებულია პოლიცია.