სააკაშვილის საქმის მტკიცებულებებს ამერიკის, ევროკავშირის, ბრიტანეთის, კანადის, ავტსრალიის მთავრობებს წარვუდგენთ - ბრაუდერი
ბრიტანულ-ამერიკული წარმოშობის ფინასისტი და "მაგნიტსკის აქტის" ავტორი, ბილ ბრაუდერი "ამერიკის ხმასთან" ვრცელ ინტერვიუში ამბობს, რომ მიხეილ სააკაშვილის საქმეზე იმ ოფიციალური პირების სია უნდა შედგეს, ვინც მას მკურნალობის საშუალებას არ აძლევს. "მაგნიტსკის აქტის" მსგავსის შექმნაში დახმარება ბრაუდერს თავად სააკაშვილმა სთხოვა.
"ჩემი აზრით, ის ტყვედ ყავს აყვანილი [საქართველოს] მთავრობას, რომელიც მას საშინლად ექცევა. მაგნიტსკის აქტი სპეციალურადაა შექმნილი იმისთვის, რომ ასეთ სიტუაციებს გაუმკლავდეს. სერგეი მაგნიტსკი ასეთ სიტუაციაში იმყოფებოდა - როდესაც ვინმეს ნელ-ნელა აწამებ, სიკვდილამდე.
ახლა გვჭირდება, რომ იმ ოფიციალური პირების სია შევადგინოთ, რომლებიც [მიხეილ სააკაშვილს] შესაბამისი მკურნალობის საშუალებას არ აძლევს, ვინც მის მიმართ არასწორ მოპყრობაზეა პასუხისმგებელი. თუ მას ძალიან სწრაფად არ გამოუშვებენ, მაშინ ამ ხალხს, ან დაუყოვნებლივ უნდა დავუწესოთ სანქციები, ან დავემუქროთ ძალიან მკაცრი სანქციებით", - ამბობს ბრაუდერი.
ჟურნალისტის კითხვაზე, მოიაზრებს თუ არა საქართველოს მთვარობის წევრებსაც ამ სიაში? - ბრაუდერი პასუხობს: "რა თქმა უნდა". მისივე თქმით, საქართველოს მთავრობაა პასუხისმგებელი სააკაშვილის კეთილდღეობაზე.
"მისი კეთილდღეობა ახლა კატასტროფულად უარესდება. ამჟამად, არ მაქვს კონკრეტული სია, მხოლოდ ახლა დავიწყე მის გუნდთან ერთად მუშაობა მტკიცებულებების მოსაპოვებლად.
ამ მტკიცებულებებს შემდეგ წარვუდგენთ სხვადასხვა მთავრობებს, მათ შორის ამერიკის, ევროკავშირის, ბრიტანეთის, კანადის, ავტსრალიისა და სხვა ქვეყნების მთავრობებს, რომლებიც მიიღებენ გადაწყვეტილებას იმასთან დაკავშირებით, არის თუ არა ეს ადამიანის უფლებების დარღვევა, იყო თუ არა მის წინააღმდეგ არაწესიერი მოპყრობა და თუ ეს დამტკიცდება, მაშინ ამ [პასუხისმგებელ] ადამიანებს სანქციები დაუწესდებათ", - ამბობს ის.
"სააკაშვილის სიაზე" საუბარი მას შემდეგ დაიწყო, რაც მიხეილ სააკაშვილმა ღია წერილით მიმართა "მაგნიტსკის სიის" ავტორს, ბილ ბრაუდერს.
"მე მკლავენ ციხეში ზუსტად ისე, როგორც მაგნიტსკის, მაგრამ ბევრად უფრო აშკარად და საჯაროდ. ჩემი თხოვნაა დაეხმაროთ ადგილობრივ ქართულ ჯგუფებს მაგნიტსკის ახალი სიის შედგენაში მანამ, სანამ ლეტალური შედეგი დადგება. ყველა სახელი საკმაოდ საჯაროა და მათ დაუსჯელობის გრძნობა განასხვავებთ, რომელიც დაკავშირებულია პუტინის დაუმარცხებლობის გრძნობასთან. მაგრამ მე და თქვენ ვიცით, რომ პუტინის დღეები დათვლილია და ჩემი ყველაზე დიდი იმედია, მის გარდაცვალებამდე ვიცოცხლო.
ამასობაში, ჩემი ჯანმრთელობა დღითიდღე უარესდება და ადგილობრივი ოლიგარქიული ნაძირლები უბრალოდ დასცინიან ჩემს გაუარესებულ მდგომარეობას. გთხოვთ დაგვეხმაროთ მთელი თქვენი ინტელექტუალური შესაძლებლობებით, მებრძოლი სულით და ფართო კონტაქტებით", - ნათქვამია მიხეილ სააკაშვილის წერილში.
ბროუდერი ღია წერილს 9 იანვარს გამოეხმაურა. მან ექსპრეზიდენტს სთხოვა, რომ მისმა გუნდმა მოამზადოს დოკუმენტი იმის შესახებ, ვინ აფერხებს მკურნალობას და ვინ არის პასუხისმგებელი მის მოწამვლასა და წამებაზე. ბროუდერი სააკაშვილს ჰპირდება, რომ ყველაფერს გააკეთებს იმისთვის, რომ ამ დოკუმენტს ყურადღება მიაქციონ მაგნიტსკის სანქციების დასავლური ქვეყნების მთავრობებმა.
სააკაშვილისა და ბროუდერის ამ კომუნიკაციას წინ უსწრებდა 2022 წლის დეკემბერში ბრიტანელი ფინანსისტის ტვიტი ექსპრეზიდენტის შესახებ, რომელშიც ის აღნიშნავდა, რომ სააკაშვილს სჭირდებოდა სამედიცინო ევაკუაცია ევროპაში და თუკი ის ამას ვერ მიიღებდა, საქმე გვექნებოდა მკვლელობასთან.