Bellingcat-ი სააკაშვილის მოწამვლის გამოძიებაში საქართველოს დახმარებას სთავაზობს
საგამოძიებო ჯგუფის, Bellingcat-ის, აღმასრულებელმა დირექტორმა ხრისტო გროზევმა საქართველოს სამართალდამცველ უწყებებს საჯაროდ მიმართა და დახმარება და თანამშრომლობა შესთავაზა საქართველოს ექსპრეზიდენტის, მიხეილ სააკაშვილის, სავარაუდო მოწამვლის საქმის გამოძიებაში.
„დარწმუნებული ვარ, ისინი [საქართველოს სამართალდამცველი ორგანოები] ამ გამოძიებით დაინტერესებული არიან. ჩვენ დახმარებისთვის მზად ვართ, თუ ისინი მზად არიან გაგვიზიარონ მონაცემები - საეჭვო ხალხის ნებისმიერი გადაადგილება, საზღვრის კვეთა და ყველაფერი, რაც მათ მიაჩნიათ, რომ დამატებით შესამოწმებელია“, - განაცხადა გროზევმა ტელეკომპანია „დოჟდის“ ეთერში.
გროზევის სიტყვებით, ჟურნალისტები გაეცნენ ამერიკელი ტოქსიკოლოგის დასკვნას, შეისწავლეს ნიმუშები, კონსულტაცია გაიარეს ქიმიური იარაღის რუს ექსპერტებთან და მივიდნენ დასკვნამდე, რომ სააკაშვილის მძიმე ლითონებით მოწამვლის ვერსია ყველაზე მეტად სავარაუდოა.
ამასთან, გროზევი მიიჩნევს, რომ არის მოტივი - მისი სიტყვებით, სააკაშვილი „ეფესბეს და გრუს მტრების წრეში შედის, რომლებსაც ასეთი გადაწყვეტილების მიღება შეეძლოთ“.
მიხეილ სააკაშვილმა გროზევს 4 იანვარს მიმართა, მისი შესაძლო მოწამვლის გამოძიების თხოვნით.
"ძვირფასო ხრისტო, დიდი ხანია ვარ თქვენი საქმიანობის თაყვანისმცემელი, მაგრამ ვერასდროს ვიფიქრებდი, რომ თქვენი დახმარების თხოვნა მომიწევდა. ალბათ იცით, რომ ამერიკული ლაბორატორიის და ცნობილი ნიუ იორკელი ტოქსიკოლოგის მიერ დადგინდა, რომ ამა წლის მარტში ვიყავი მოწამლული ციხეში“, - მისწერა სააკაშვილმა გროზევს და სთხოვა, გამოიძიოს „რუსეთისა და რუსეთთან აფილირებული მოძრაობები საქართველოში“.
საქართველოს ექსპრეზიდენტი სააკაშვილი 2021 წლის ოქტომბერში დააკავეს საზღვრის უკანონო კვეთის ბრალდებით. 2022 წლის მაისში ის კლინიკა „ვივამედში“ გადაიყვანეს. ნოემბერში სააკაშვილის ადვოკატმა განაცხადა, რომ მისი დაცვის ქვეშ მყოფის სხეულში დარიშხანი აღმოაჩინეს. ექიმების თქმით, პოლიტიკოსის სისხლში ასევე აღმოჩენილია მძიმე ლითონები. 29 დეკემბერს ამერიკელმა ტოქსიკოლოგმა დევიდ სმიტმა სასამართლო სხდომაზე, რომელზეც სააკაშვილისთვის სასჯელის გადავადების ან სასჯელისგან გათავისუფლების შუამდგომლობას განიხილავდნენ, განაცხადა, რომ ყოფილი პრეზიდენტის ინტოქსიკაცია 2022 წლის მარტში მოხდა მანამ, სანამ მას კლინიკაში [12 მაისს] გადაიყვანდნენ.