ბელარუსმა აქტივისტებმა "ლელოსთან" აქცია გამართეს - რუსები არ ვართ და საქართველოს სახელმწიფოს საფრთხეს არ ვუქმნით
საქართველოში მცხოვრებმა ბელარუსის მოქალაქეებმა "ლელოს" ოფისთან აქცია გამართეს და ამ გზით გააპროტესტეს პარტიის ინიციატივა, რუსეთის მოქალაქეებთან ერთად, ბელარუსებსაც დაუწესდეთ სავიზო რეჟიმი საქართველოში შემოსასვლელად.
ბელარუსების აქცია იყო მცდელობა ქართველი პოლიტიკოსებისთვის აეხსნათ, რომ მათი რუსებთან გათანაბრება კრემლის ინტერესებს ემსახურება და რომ აქ მყოფი ბელარუსების უმეტესობა, გარდა იმისა, რომ პატივს სცემს საქართველოს დამოუკიდებლობასა და სუვერენიტეტს, თავშესაფრად მიიჩნევს ამ ქვეყანას, როგორც ერთადერთ დასავლურ სახელმწიფოს, სადაც ჯერ კიდევ შეუძლიათ სანქციებში მყოფი ბელარუსიდან გამოექცნენ ლუკაშენკას რეპრესიებს.
"ბელარუსების აბსოლუტური უმრავლესობა იმყოფება საქართველოს ტერიტორიაზე ევროკავშირის ქვეყნებში შემდგომი ფრენისთვის ვიზის მისაღებად. ვინც საქართველოში დიდხანს რჩება, როგორც წესი, IT სექტორის თანამშრომლები არიან – დასავლურ კომპანიებში მუშაობენ, იქ შოულობენ ფულს და საქართველოში ხარჯავენ, მაგრამ ეკონომიკიდან უცხოურ ვალუტას არ რეცხავენ.
უკრაინაში ომის დაწყების შემდეგ, საერთაშორისო საზოგადოების მხრიდან ბელარუსის პრობლემაზე ყურადღება საგრძნობლად შემცირდა. საზღვარგარეთ რეპრესირებულ ბელარუსებს არ აქვთ მხარდაჭერა, ზოგიერთი ორგანიზაცია უარს ამბობს თანამშრომლობაზე. იმის გამო, რომ ოფიციალურმა ბელარუსმა თავისი ტერიტორია გამოყო რუსეთის ჯარებისთვის, ხშირად ისმის ბრალდებები რიგითი მოქალაქეების მიმართ. ეს საქართველოშიც შესამჩნევია. მაგალითად, TBC ბანკი იყო ერთ-ერთი პირველი, ვინც უარი თქვა ბელარუსებისთვის ანგარიშების გახსნაზე", - ნათქვამია აქციის ორგანიზატორების მიერ გავრცელებულ ინფორმაციაში. ისინი აქცენტს აკეთებენ იმ რეპრესიებსა და დევნაზე, რომლებსაც 2020 წლის მასობრივად გაყალბებული საპრეზიდენტო არჩევნების შემდეგ ლუკაშენკა ახორციელებს მისი ოპონენტებისა და კრიტიკულად განწყობილი ადამიანების მიმართ. აქციის ორგანიზატორები ყურადღებას ამახვილებენ ასევე იმაზე, რომ უკრაინაში მიმდინარე ომმა გადაიტანა საერთაშორისო საზოგადოების ყურადღება ბელარუსიდან, სადაც აქტივისტები შესაძლოა, სოციალურ ქსელში გამოქვეყნებული სტატუსის გამო აღმოჩდნენ ციხეში, საპატიმრო დაწესებულებებში კი წამებისა და არაადამიანური მოპყრობის მსხვერპლი ხდებიან. ამის მიუხედავად, ბელარუსები პარტიზანულ ომში არიან ჩართული უკრაინის მხარდასაჭერად და სიცოცხლეს რისკავენ მათ დასახმარებლად.
"მიუხედავად იმისა, ჩვენ გვყვავს ხელისუფლება, რომელიც ვერ გრძნობს და აღიქვამს იმ საფრთხეებს, რომელიც მომდინარეობს რუსეთიდან და მასთან დაკავშირებული სახელმწიფოებიდან, საქართველოს ჭირდება გონივრული საემიგრაციო პოლიტიკა. ჩვენი კანონპროექტის ძირითადი აქცენტრი არის რუსებზე და რუსეთიდან მომდინარე ვიზიტორების ძალიან დიდ ტალღებზე, ჩვენი ინიციატივა ითვალისწინებს ბელარუსის მოქალაქეებისთვისაც სავიზო რეჟიმის გამკაცრებას იმის გამო, რომ ბელარუსი არის ის სახელმწიფო, რომელიც არაპირდაპი არის უკრაინის მიმართ აგრესიაში ჩართული.
ჩვენ დღეს აქციაზე მოსულ ადამიანებს ავუხსენით, რომ ეს ჩვენი მოთხოვნა არც ერთ შემთხვევაში არ ეხებათ იმ ადამიანებს, ვინც გამოექცნენ რეჟიმს. პირიქით, გონივრული სავიზო და საემიგრაციო რეგულაციები პირველ რიგში ასეთი ადამიანების უფლებების გამყარებას შეუწყობს ხელს. ჩვენ მნიშვნელოვნად მიგვაჩნია, რომ დისიდენტებს და რეჟიმისგან დევნილ ადამიანებს რუსეთიდანაც და ბელარუსიდანაც შეეძლოთ თავშესაფრის მიღება საქართველოში. ასეთი ადამიანების შემთხვევაში პირიქით უფლებრივი გარანტიების შექმნაზე ვართ ფოკუსირებულები და არა ბლანკეტურად ყველას უფლებების შეზღუდვაზე" - უთხრა რადიო თავისუფლებას პარტია "ლელოს" წევრმა, საბა ბუაძემ. ის ერთ-ერთი იყო პარტიის წევრებს შორის, ვინც პარტიის ოფისთან გამართული აქციის მონაწილეებთან სალაპარაკოდ მივიდა. საბა ბუაძე განმარტავს, რომ მათი მიზანი არა საქართველოში შემოსვლის გართულება, არამედ აქ მყოფი ადამიანების დიფერენცირება იმის მიხედვით, ვინ ხამმოკლე ვიზიტით არის საქართველოში და ვინ ხანგრძლივად საცხოვრებლად.
"ჩვენ ვამბობთ რომ უვიზო რეჟიმი უნდა გამკაცრდეს და არა უნდა გაუქმდეს. მათ უნდა შეეძლოთ უვიზოდ შემოსვლა და 30 დღის მიღმა ვისაც აქვს სურვილი დარჩენის, მათთვის უნდა იქნეს შემუშავებული რეგულაციები, რომ მიიღონ ლეგალური სტატუსი" - განმარტავს საბა ბუაძე.
"როგორც 2008 წელს ქართველების მასობრივი განადგურების შემდეგ აღარ არის შესაძლებელი „ქართველთა და რუსთა მარადიულ მართლმადიდებლურ ძმობაზე“ საუბარი, ასევე ბელარუსში მასობრივი რეპრესიებისადმი რუსეთის არაერთგზის მხარდაჭერის შემდეგ, ჩვენ არ გვინდა გვერდით დაყენება მოძალადე რუსეთთან, ბელარუსების შესახებ აშკარა მოძველებულ იდეებზე დაყრდნობით. ევროპული ქვეყნის პოლიტიკოსებმა და საზოგადო მოღვაწეებმა უნდა იცოდნენ, რომ ერთმა ან ორმა უყურადღებო წინადადებამ შეიძლება სერიოზულად გაართულოს პრორუსული დიქტატურის მიერ დევნილი ათიათასობით ადამიანის ცხოვრება", - ამბობენ საქართველოში მცხოვრები ბელარუსის მოქალაქეები.
საბა ბუაძეს ვკითხეთ, რამდენად არის შესაძლებელი მოქმედი ხელისუფლების პირობებში, რომელიც მისივე თქმით, ვერ აღიქვამს რუსეთიდან მომდინარე საფრთხეებს სათანადოდ, გატარდეს ის ცვლილებები სავიზო და საემიგრაციო პოლიტიკაში, რაც პარტია ლელომ დააინიცირა. საბა ბუაძეს არ აქვს იმედი რომ "ქართული ოცნება" მათ ინიციატივას მხარს დაუჭერს.
"როდესაც ხარ ოპოზიციაში, იმედი რომ ხელისუფლება შენს შეთავაზებას გაითვალისწინებს, არის მცირე. მით უმეტეს მაშინ, როცა ხელისუფლებაში არის დესტრუქციული და ანტიდასავლური "ქართული ოცნება". ჩვენ ამ შეთავაზებას ხელისუფლებას კი არ ვუკეთებთ, ვუკეთებთ საზოგადოებას, რომელმაც უნდა დაინახოს ალტერნატივა ხელისუფლებას და ოპოზიციას შორის. ეს არის ძირითადად ყველა ჩვენი ინიციატივის მიზანი. ეს ხელისუფლება რომ რამეს გაითვალისწინებს და ნორმალურ პოლიტიკურ პროცესს წარმართავს, ამის მოლოდინი არ გვაქვს. ჩვენ ხელისუფლების კრიტიკის მიღმა გვინდა საზოგადოებას შევთავაზოთ ხოლმე ჩვენი ხედვა და ალტერნატივა, ამიტომაც ვახმოვანებთ ხოლმე ამ ინიციატივებს" - უთხრა რადიო თავისუფლებას საბა ბუაძემ.
პარტია "ლელო" უკრაინაში ომის დაწყების შემდეგ ითხოვს სავიზო რეჟიმის დაწესებას რუსეთის მოქალაქეებისთვის. რუსებისა და ბელარუსებისთვის სავიზო რეჟიმის დაწესების კონკრეტული ინიციატივა პარტიამ 2 აგვისტოს წარადგინა.