თეირანის პირველი რეაქცია: არავითარი კავშირი რუშდიზე თავდასხმასთან. ბლინკენი კიცხავს ირანის პრესას
მწერალ სალმან რუშდიზე თავდასხმიდან მესამე დღეს, ირანმა განაცხადა, რომ არავითარი კავშირი არ აქვს მომხდართან. საგარეო საქმეთა სამინისტროს წარმომადგენლის თქმით, რუშდი და მისი მომხრეები არიან თავდასხმაში დამნაშავე. მისი თქმით, აზრის თავისუფლად გამოხატვის უფლება არ ამართლებს, რომ რუშდი თავის ნაშრომებში რელიგიას შეურაცხყოფს. ვაშინგტონი ირანის სახელმწიფო მედიას კიცხავს რუშდიზე თავდასხმის მიმართ რეაქციის გამო, როცა დანაშაულის ჩამდენი ქებით იყო მოხსენიებული.
გავრცელებული ცნობებით, რუშდის მდგომარეობა უმჯობესდება, თუმცა მწერალს დაზიანებული აქვს ღვიძლი, ხელის ნერვები და შეიძლება, დაკარგოს თვალი.
რუშდის 12 აგვისტოს სცენაზე გამოსვლის წინ დანით თავს დაესხა 24 წლის მოქალაქე და მძიმედ დაჭრა იგი. თავდასხმა მოხდა აშშ-ში, ნიუ-იორკის შტატში.
თავდასხმაში ეჭვმიტანილი ნიუ-ჯერსელი ჰადი მატარია. მას ბრალი უკვე წარედგინა. მატარიმ თავისი ადვოკატის საშუალებით განაცხადა, რომ თავს დამნაშავედ არ ცნობს. თავდასხმის მოტივები არ არის ცნობილი. გამოძიებას აწარმოებენ ნიუ-იორკის შტატის ფედერალური სამართალდამცავი სტრუქტურები.
სალმან რუშდიმ, ინდური წარმოშობის ბრიტანელმა მწერალმა, 1988 წელს გამოსცა თავისი რომანი "სატანური ლექსები,“ რომელმაც ბევრი მუსლიმის გულისწყრომა გამოიწვია და ავტორს წინასწარმეტყველი მუჰამედის შეურაცხყოფა დააბრალეს. ირანის მაშინდელმა ლიდერმა, აიათოლა ხომეინიმ მწერალს სასიკვდილო განაჩენი გამოუტანა თავისი ფატვით და მისი თავისთვის დიდი ჯილდო დააწესა. რუშდი დიდხანს. წლების განმავლობაში იძულებული იყო მალვაში ყოფილიყო, მას პოლიცია იცავდა, ხშირად იცვლიდა საცხოვრებელს.
რუშდი პირველად საჯაროდ გამოჩნდა 1995 წელს. 1998 წელს ირანის საერო ხელისუფლებმა გამოაცხადეს, რომ სალმან რუშდის საქმე "მთლიანად დასრულებულია" და ირანი არც თვითონ შეეცდება რუშდის სიცოცხლის ხელყოფას და აღარც სხვას წააქეზებს ამისკენ. ამავე დროს წლების განმავალობაში ირანის სასულიერო ხელისუფლება ზრდიდა ჯილდოს ოდენობას, რომელიც ადრე იყო დაწესებული.
აშშ-ის სახელმწიფო მდივნის, ენტონი ბლინკენის განცხადებაში ნათქვამია, რომ ირანის სახელმწიფო უწყებები თაობების მანძილზე გამოდიოდნენ წაქეზებით რუშდის წინააღმდეგ და „სახელმწიფო მედიის საშუალებები ახლახან ხარობდნენ მის სიცოცხლეზე თავდასხმის გამო“, - წერს ბლინკელი. "რაც ამაზრზენია", - დასძენს იგი 14 აგვისტოს განცხადებაში.