ორი კვირაა ოკუპირებული ჯავის რაიონის სოფლები გარესამყაროსაა მოწყვეტილი
ადგილობრივების თქმით, თოვლმა დაფარა დაბა კვაისასკენ მიმავალი მთავარი მაგისტრალიც. „სოფლების სინაგურისა და თედელეთის მაცხოვრებლები, ასევე სასაზღვრო საგუშაგოზე მყოფი სამხედრო მოსამსახურეების ოჯახები, საკვების მარაგს ეკონომიურად იყენებენ. მარაგი გვეწურება. დიდი ხანია ჩვენ ამ მდგომარეობაში არ ვყოფილვართ. ამიტომ არც სპეციალურად შეგვიქმნია მარაგი. გვითავდება საკვები, საყოფაცხოვრებო ქიმიური საშუალებები. სოფლებში არიან ონკოლოგიური ავადმყოფები, რომლებიც ქიმიოთერაპიაზე ვერ მიდიან", - წერენ გარესამყაროს მოწყვეტილი სოფლებიდან.
საინფორმაციო სააგენტო „რეს"-ის ცნობით, დიდთოვლობის და ზვავების გამო ტრანსპორტის გადაადგილება შეუძლებელია. ადგილზე მობილიზებული ტექნიკა გამართულად ვერ მუშაობს, რადგან ერწოს უღელტეხილზე გაჩერებული მანქანები დაბრკოლებას ქმნიან. დე ფაქტო სამხრეთ ოსეთის რესპუბლიკის საავტომობილო გზების მშენებლობისა და მოვლის კომიტეტის თავმჯდომარის, ედუარდ გუზიტაევის თქმით, ადგილზე სიტუაციის შესასწავლად კომიტეტის თანამშრომლები უკვე გავიდნენ.
„ჩვენ საქმის კურსში ვართ, რაც ხდება. სოფელ სინაგურისკენ წავედით, რათა ადგილზე შეგვესწავლა ვითარება და გადავწყვიტოთ, როგორ დავძლიოთ ეს პრობლემა", - განაცხადა გუზიტაევმა. ამ ყველაფერს ისიც დაემატა, რომ იზოლირებული სოფლებისკენ გაგზავნილი ტრაქტორი გაფუჭდა და გზის გაწმენდის სამუშაოები საერთოდ შეწყდა. გარემოს მოწყვეტილი სოფლებისკენ გაემგზავრა დე ფაქტო რესპუბლიკის ე.წ. პრეზიდენტი ანატოლი ბიბილოვი, რომელმაც სოციალურ ქსელში დაწერა, რომ გზას მალე გაწმენდენ.
„რამდენიმე საათში სოფელ სინაგურამდე გზა გაიწმინდება. ასეთი თოვლი ათწლეულების განმავლობაში არ ყოფილა. გზის ზოგიერთ მონაკვეთზე თოვლის საფარის სიმაღლე სამ მეტრს აღემატება. მობილიზებული გვყავს საგანგებო სიტუაციების სამინისტროს ძალები“, - განაცხადა ანატოლი ბიბილოვმა ადგილზე ჩასვლის შემდეგ.
მარტის დასაწყისიდან რამდენჯერმე ჩაიკეტა როკის გვირაბიც. ოკუპირებული ცხინვალის რუსეთის ფედერაციასთან შეწყვეტილი საგზაო კომუნიკაციის გამო, დე ფაქტო რესპუბლიკაში პროდუქციის დეფიციტი შეიქმნა, რამაც ფასების ზრდა გამოიწვია. ამას რუსეთის ფედერაციის წინააღმდეგ საერთაშორისო სანქციებიც დაემატა, გაუფასურებული რუბლის პირობებში კი პროდუქტი და ყოველდღიური მოხმარების საყოფაცხოვრებო საშუალებები ყოველდღიურად ძვირდება.