ნანუკა ჟორჟოლიანი: მე, ნოდარ მელაძე და გიორგი გაბუნია გაგვიშვეს
ტელეკომპანია რუსთავი 2-ის ჟურნალისტი ნანუკა ჟორჟოლიანი ფეისბუქის საკუთარ გვერდზე წერს, რომ ტელეკომპანიის ახალმა ხელმძღვანელობამ ის, ნოდარ მელაძე და გიორგი გაბუნია, სამსახურიდან გაათავისუფლეს.
ნანუკა ჟორჟოლიანი რადიო თავისუფლებას ეუბნება, რომ ეს ინფორმაცია მან რამდენიმე წუთის წინ, ნოდარ მელაძისგან შეიტყო:
„უცნაურია, ჯერ კიდევ გუშინ, ჩემი გადაცემისთვის ახალი სტუდიის დაგეგმვაზე ვლაპარაკობდით პაატა სალიასთან ერთად. ახლა კი უცებ ეს ინფორმაცია მომდის. ზოგადად ველოდით, რომ ჩვენ გაგვიშვებდნენ, მაგრამ ეს გადაწყვეტილება მაინც მოულოდნელი იყო. ჩემი სტრატეგია იყო, რომ სანამ არ გამიშვებდნენ, ტელევიზიიდან არ წავსულიყავი. მეტი დეტალის შესახებ ჯერჯერობით არაფერი ვიცი“, - ეუბნება რადიო თავისუფლებას ნანუკა ჟორჟოლიანი.